(((( الست لما تبطل تتكلم ))))

بقلمى ✍️احمد حمدى 

مستشار علاقات دبلوماسية المجلس العربى الافريقى الدولى 

العلاقة اللي بتتعالج بالكلام ممكن تعيش ، لكن اللي بتتعالج بالصمت .. خلاص انتهت

فيه لحظة في أي علاقة ..

بتبقى نقطة فاصلة ما بين “ لسه في أمل ” و “ كل حاجة خلصت.” .

اللحظة دي مش لما بيتخانقوا ، ولا لما بيزعلوا ، لكن لما يسكتوا .

الصمت اللي بييجي بعد وجع مش راحة ، ده استسلام .

الصمت بيقتل العلاقة بهدوء ، من غير صوت خناق ، ولا دموع ، بس بخطوات باردة بتسحب الروح من بينهم واحدة واحدة .

في الأول بيتخانقوا ، بيتكلموا ، بيشرحوا ، بيحاولوا يوصلوا لبعض .

وده معناه إنهم لسه مهتمين ، لسه بيحاولوا ينقذوا اللي بينهم .

لكن لما يوصلوا للمرحلة اللي كل واحد فيهم يبطل يشرح ،

يبطل يرد ، يبطل يوضح ..

يبقى خلاص .

فيه حاجة جوّاهم ماتتت .

الست لما تبطل تتكلم ، ده مش لأنها ارتاحت .

ده لأنها تعبت من التفسير .

تعبت من إنها دايمًا تحاول تفهم الراجل اللي بيحبها ليه بيأذيها ، وتعبت من إنها توضح وجعها كأنها بتترجاه يفهمها .

الصمت عند الست مش هدوء ..

ده علامة إن في حاجة انكسرت جواها ومش ناوية تتصلح.

كانت بتحكي ، كانت تشرح ، بس لما لقت إن كلامها بيروح في الهوا ، بدأت تسكت .

وساعتها العلاقة بتتحول لحاجة شكلها “ مستمرة ”

بس روحها خلصت من زمان .

الكلام هو الجسر اللي بيربط روحين ببعض ، فلما الجسر يقع ، كل واحد بيبقى في جزيرة لوحده .

الصمت بيعمل مسافة بين الناس حتى لو قاعدين جنب بعض ، وبيخلي العيون تشوف بعض من بعيد كأن بينهم بحر .

العلاقة اللي بتتعالج بالكلام ، حتى لو اتخانقوا كل يوم ، عندها فرصة تعيش .

لأنهم لسه بيحاولوا يوصلوا لبعض .

لكن اللي بتتعالج بالصمت ؟

مفيش حاجة تتصلح من غير صوت ، مفيش حب يعيش في فراغ .

الست اللي كانت بتحكي كتير وسكتت ، مش نقص حبها ..

لكن زاد وجعها .

بقت تحس إن الكلام ملوش معنى ، وإن حتى لو قالت ، مش هيتغير حاجة .

وفي اللحظة دي ، هي فعلاً بتكون خلاص قررت تمشي ، بس بتمشي وهي لسه موجودة شكلاً.

بتنسحب بهدوء ، خطوة خطوة ، لحد ما الراجل يلاقي نفسه بيتكلم لوحده .

الصمت مش سلام ، الصمت قبر بيتدفن فيه الحب ببطء.

وكل مرة بنتجاهل فيها الكلام ، بنقرب من النهاية من غير ما نحس .

اتكلموا ..

حتى لو الوجع صعب .

لأن الكلمة اللي بتتقال من القلب ممكن تنقذ ، بس السكوت عمره ما أنقذ علاقة في يوم .

‏💫 كلمات من القلب.. بتحكي عن الحياة والحب والحقيقة من غير أقنعة.

‏🍃 صدق الإحساس وعمق المعنى هو سر كل كلمة هنا.

‏🌹 أكتب عن المرأة لأنها مرآة الروح، وعن الحب لأنه لغة القلوب،

‏🧠 وعن النفس.. لأنها أغرب حكاية جوّانا كلنا.

‏❤️ اقرأ بعقلك مرة، وبقلبك ألف مرة.

‏

‏