كتب: احمد عيسي الزوامكى
من 2021 إلى 2026.. خمس سنين من «حياة كريمة»، ومشكلة مياه الكعيمات لسه بتطرق أبواب المسؤولين!
الكعيمات «بلاد المال قبلي» التابعة لمركز أبوتشت بقنا، بتعاني من أزمة مياه شرب ممتدة لأكتر من 20 سنة، رغم دخول أبوتشت ضمن مشروعات «حياة كريمة» واستهداف 33 قرية بالمركز، والإعلان عن مئات المشروعات وتدعيم شبكات مياه بطول 176 كيلومترًا لخدمة قرى المركز.
وهنا السؤال اللي لازم يتجاوب عليه بوضوح:
أين الكعيمات من كل ده؟
مش عايزين كلام عام.. عايزين أرقام:
كام مشروع مياه اتنفذ في الكعيمات من 2021 لحد 2026؟
كام متر أو كيلومتر شبكات وصل للقرية؟
إيه اللي اتعمل لحل مشكلة ضعف المياه؟
وإيه مصير الحلول المقترحة لتدعيم خط الكعيمات؟
أهالي الكعيمات بيطرحوا حلولًا فنية واضحة تستحق الدراسة، أهمها:
تخصيص خط للكعيمات، خصوصًا مع بُعد القرية وارتفاع منسوبها وما يترتب على ذلك من صعوبة وصول المياه.
دراسة ربط الخط القادم من ناحية النوايل قبلي بالكعيمات وربطه بالخط المنتهي عند المعهد الديني القبلي.
دراسة ربط خط الحاجر الشرقي القادم من ناحية النوايل، والمنتهي عند كرم الحاجر، بالخط الشرقي للكعيمات.
دي مش مطالب مستحيلة، لكنها مقترحات تحتاج لجنة فنية تنزل على الطبيعة وتقول للناس بوضوح: ينفع.. أو ما ينفعش.. وليه.
ولو كان فيه خط جديد تم تنفيذه لخدمة العوامر، فالسؤال المشروع: هل يمكن فنيًا الاستفادة منه أو تحميله لخدمة الكعيمات؟
أما تقييم المسؤولين عن الملف، فده دور الجهات المختصة، لكن استمرار أزمة لأكثر من 20 سنة يستحق بلا شك مراجعة كاملة للأداء والحلول التي تم تنفيذها والتي لم تُنفذ.
من 2021 إلى 2026.. المواطن مش عايز يسمع عن حياة كريمة، المواطن عايز يشوف أثرها في حنفيته.
الكعيمات تسأل: أين نصيبنا من حل أزمة المياه؟
والسؤال مفتوح أمام شركة مياه الشرب والصرف الصحي بقنا، ومحافظة قنا، والجهات المسؤولة عن حياة كريمة.
ليست هناك تعليقات:
إرسال تعليق