أصعب أنواع الوحده مش انك تقعد لوحدك ، أو تعيش لوحدك ، أو ان مفيش حد حواليك
الوحده الحقيقيه لما تكون محاط ب ناس كتير بس محدش عارف يلمس الجزء الحقيقي اللي جواك..
الوحده النفسيه أكبر سجن ممكن الإنسان يحس بيه، لانها لا تقاس بعدد الناس بقدر ما تقاس بمقدار فهم اللي حواليك ليك...
احنا تقريبا بنقضي جزء كبير من حياتنا بنهرب من الوحده، بكل أشكالها و انواعها عايزين نكون صداقات و ندخل في علاقات عشان داخليا مش مستعدين لمواجه الوحده ، و احيانا بنكتشف ان المشكله مش ف عدد الناس لكن كانت في طريقة الإتصال بينا و بينهم
و لازم نعرف ان فيه فرق بين الوحده و الشعور بالوحده ، انك تكون وحيد دي حاله خارجيه او ظروف خارجه عن ارادتك و لكن الشعور بالوحده حاله داخليه ، الإنسان مهما كان حواليه ناس هو جواه وحيد ... مش مفهوم من اقرب الناس ليه ..
عشان كده بنلاقي ان ممكن شخص يعيش لوحده في سلام لانه مش حاسس بالوحده ..و شخص تاني حواليه مجتمع و حياه لكن حاسس انه معزول عنهم
السؤال هنا .. امتي الانسان يبطل يحس بالوحده او يبطل يبحث عن ناس خوفا من الوحده؟
الوعي و النضج النفسي الحل الوحيد .. لما الانسان يعي ان سعادته في عدم وجود الآخرين حواليه هيوصل للسلام النفسي في وحدته
النضج الحقيقي مش انك تهرب من شعورك بالوحده ، و لكن تكتشف نواحي مختلفه في أعماق نفسك عشان تستمتع بوقتك الخاص ...اللي الناس بتفتكره وحده. بقلم عاشقة الوطن...سحر غانم
ليست هناك تعليقات:
إرسال تعليق