بقلم استاذ /محمد جلال
الرجولة في مصر بقت محتاجة تحليل جيني فعلًا، مش علشان نعرف مين عنده كروموسوم الرجولة، لكن علشان نعرف مين فاهم أصلًا يعني إيه رجولة.
الغريب إن لسه فيه ناس شايفة إن ضرب الست نوع من أنواع القوة وفرض السيطرة، مع إن الحقيقة عكس كده تمامًا. الراجل اللي يمد إيده على واحدة أضعف منه مش قوي، ده شخص عاجز عن التحكم في نفسه، ومش لاقي وسيلة يثبت بيها نفسه غير إيده.
الرجولة مش إنك تخوف ست، ولا إنك تعلي صوتك عليها، ولا إنك تستغل قوتك الجسدية عشان تكسرها. الرجولة إنك وقت الغضب تعرف توقف نفسك، ووقت الخلاف تعرف تتكلم، ووقت الاختلاف تعرف تحترم.
والأغرب إن بعض أشباه الرجال بيبرروا العنف بكلام من نوع: «هي استفزتني» أو «هي اللي بدأت». مفيش استفزاز يديك حق تهين أو تضرب إنسان، لأن التحكم في النفس هو الاختبار الحقيقي للرجولة.
الست مش ميدان تثبت فيه إنك راجل، والبيت مش حلبة مصارعة. اللي بيضرب امرأة عشان يثبت قوته، هو في الحقيقة بيعلن قدام الناس إنه ضعيف من الداخل.
الرجولة أخلاق ومسؤولية وضبط نفس… مش إيد بتتمد على ست.
ليست هناك تعليقات:
إرسال تعليق