متابعة ورصد الخير
بقلم ✍️احمد حمدى مستشار علاقات دبلوماسية المجلس العربى الافريقى الدولى للعلاقات الدبلوماسية ورئيس اللجنة العليا للصحافة والاعلام
منطقة شمال إفريقيا كلها بتمر حاليًا بواحد من أصعب مواسم الحرائق اللي المنطقة شافتها من سنين، في وسط درجات حرارة قياسية ورياح جافة بتحول أي شرارة صغيرة تحصل في أي حتة لكارثة ضخمة خلال دقايق...
⚫️ خلينا نبدأ بالجزائر، عشان الوضع عندهم للأسف هو الأخطر على الإطلاق... السلطات الجزائرية اضطرت من شوية تبدأ إخلاء سكان مناطق كاملة في ولاية عنابة، خصوصًا في مدينة سرايدي والمناطق الجبلية المحيطة بيها، بعد ما حرائق الغابات هناك خرجت عن السيطرة بسبب موجة الحر والجفاف اللي وصلت فيها درجات الحرارة في بعض المدن الساحلية لحوالي 49 درجة مئوية!
وأوامر الإخلاء دي مش بس للمدنيين والبيوت، بل وصلت حتى للمستشفيات نفسها... مستشفى سرايدي تم إخلاءه بالكامل من كام ساعة ونقلوا المرضى اللي فيه لأماكن تانية، في نفس الوقت كانت فيه طيارات الإطفاء والمروحيات العسكرية بتحاول تمنع النيران من الوصول للبيوت والمناطق المأهولة...
🔸️ وعشان تبقى مستوعب خطورة الوضع، هكلمك شوية بالأرقام...
من أول مايو لحد دلوقتي الجزائر سجلت أكتر من 3700 حريق، مقارنة بحوالي 1500 حريق بس في نفس الفترة من السنة اللي فاتت، يعني زيادة تقرب من 150% في سنة واحدة بس!
وفي خلال الكام يوم اللي فاتوا، الجزائر لوحدها سجلت 170 حريق في يوم واحد، ورجال الإطفاء قدروا يطفوا 104 منها، لكن حاليًا لسه في عشرات الحرائق مشتعلة في 19 ولاية مختلفة... وللأسف وزارة الداخلية الجزائرية أعلنت وفاة 6 أشخاص لحد دلوقتي بسبب الحرائق دي... ده غير ان النار دمرت أكتر من 1600 هكتار من الغطاء النباتي، وده أعلى مستوى دمار تشهده الجزائر من ساعة الحرائق الكارثية اللي حصلت سنة 2021!
🔹️ ونفس الكلام بردو بيحصل في تونس والمغرب...
في تونس، النيران ماسكة دلوقتي في غابات الشمال والشمال الغربي، في مناطق جندوبة وبنزرت وعين دراهم وفرنانة وزغوان، والحرائق وصلت للمناطق السكنية وأجبرت الأهالي على إجلاء النساء والأطفال والماشية من القرى اللي هناك... وحاليًا طيارات الإطفاء شغالة على مدار الساعة عشان يحجموا النار ويسيطروا عليها...
وفي المغرب خلال الكام يوم اللي فاتوا، النار دمرت أكتر من 600 هكتار من الغابات في مناطق تارودانت وبني ملال وأزيلال، وفي أكتر من 1180 فرد من رجال الإطفاء والغابات والجيش والمتطوعين شاركوا في احتواء الكارثة، ومعاهم 8 طيارات متخصصة في إخماد الحرائق... والحمد لله تم السيطرة على الوضع حاليًا...
🔶️ وهنا بييجي السؤال المهم... ليه كل ده بيحصل دلوقتي بالشكل المخيف ده؟
الحقيقة إن اللي بيحصل في شمال أفريقيا دلوقتي ده مش حوادث منفصلة... ده جزء صغير من أزمة عالمية أكبر اسمها التغير المناخي... متوسط درجات الحرارة على الكوكب عمال بيزيد سنة بعد سنة؛ والجفاف الطويل والرياح الجافة بقوا بيزودوا حرائق الغابات ويخلوها تنتشر بسرعة أكبر وعلى نطاق أوسع!
ده للأسف الواقع الجديد اللي هنبقى معتادين عليه في الفترة اللي جاية... التغير المناخي اللي كنا زمان بنحس إنه موضوع بعيد عننا وعن حياتنا اليومية، أو مجرد أرقام في دراسات علمية متخصناش، أصبح بيضربنا النهاردة في قلب دولنا العربية وشايفين آثاره بعيوننا...
والمشكلة الأكبر إننا لسه رغم كل اللي بنشوفه ده، مش مستوعبين حجم اللي جاي...
ربنا يسترها على اخواتنا واشقاؤنا العرب ويسترها على بلدنا الحبيبة مصر 🇪🇬
ليست هناك تعليقات:
إرسال تعليق