كتبة لكم بقلم✍️
احمد حمدى
مستشار علاقات دبلوماسية المجلس العربى الافريقى الدولى
تقدر تتخيل إن المشهد ده حصل بجد؟ مشهد لطفل مع أقسى أب وأم ممكن تشوفهم في حياتك
أب وأم كانوا متجوزين وخلفوا ولد صغير بس ميحصلش نصيب بينهم وبعدها ينفصلوا .. الأم أخدته باعتبارها الحاضنة، والأب اتجوز وعاش حياته وخلف ورمى وراه كل اللي فات
وأستمر الوضع طبيعي ، لحد من فترة جدة الولد توفت، والأم اتجوزت، لكن جوزها الجديد مش عاوزه في البيت، فقررت تتخلص منه ، الولد فضل يتنقل من شارع لشارع ومن بيت لبيت ، لحد ما ناس أستضافوه عندهم وعرفوا قصته وخدوه للمركز
المركز أمر فورًا إن الولد يروح لأبوه، لأن الأم اتجوزت والجدة توفت، وبكده الأب هو المسؤول عنه
راحوا للأب، وأول ما فتح الباب الأبن قرب ناحيه أبوه علشان يسلم عليه ، بس الأب الجاحد ما بصش حتى لابنه لا حضنه، ولا سأله عامل إيه، ولا قاله وحشتني يا ابني..
بالعكس...
قال لهم: "ودوه للمحامي بتاعي ، الكلام معاه هو مش معايا."
الناس قالوا للأب " أحنا ملناش دعوة بمحاميين ده أبنك ، أبوك أهو يا ابني ، وربنا والناس شاهدين أننا عملنا الي علينا وجبناك لحد أبوك وهو الي مش عاوز يستلمك"
في اللحظة دي خرجت الجاحدة زوجة الأب وقالت: "ودوه لأمه، إحنا ملناش دعوة بيه ومش هنربيه"
والولد واقف شايف كل ده بعنيه...
شايف مرات أبوه بتطرده، وأبوه اللي المفروض يبقى ضهره وسنده في الدنيا واقف ولا كأنه شايفه أصلًا ، وأمه إلى المفروض تكون أحن واحدة عليه فالدنيا أختارت نفسها ورمته ومرمطته وخلت الكل يبيع ويشتري فيه
الناس مشيت وقالوا للولد " متجيش ورانا تاني ، أحنا مش هنربي لحم غيرنا "
والأب دخل وقفل الباب في وش ابنه
الولد فضل واقف قدام الباب بيبكي ..
مش مستوعب..
مش مصدق...
طب أنا عملت لكم إيه؟
ذنبي إيه؟
أنت أبويا ودي أمي...
وأنتوا الاتنين رمتوني!
حتي الناس الي قبلوني وكنت مفكرهم عيلتي الجديدة ماشيين وهيسبوني
هو أنا وحش للدرجة دي؟
هو أنا غير مرغوب فيا للدرجة دي؟
طب جبتوني الدنيا ليه؟
مؤلم صح؟
لأ... استنى
تخيل الطفل ده فضل واقف قدام الباب وفاكر أن أبوه بيهزر ومستنيه يفتحه تاني وياخده في حضنه ويقوله تعالي ، ولكن ده محصلش!
يا الله على كسرة النفس..
أقسم بالله موقف يبكي الحجر ، أصعب إحساس في الدنيا إنك تحس إنك تقيل... وإنك غير مرغوب فيك من أقرب الناس ليك
ملعون أبو الجواز علي المشاكل الشخصية علي الفلوس لو هتنتهي بالشكل ده وعيل ملهوش أي ذنب يدفع فاتورة مش فاتورتة علشان اب وام جاحدين بينتقموا من بعض فيه هو..
وملعون أي حد مش قد مسؤولية جواز وخلفة وتربية عيال.
العيال مش لعبة تترمي ، ولا مشروع يتقفل لما المزاج يقل ، ولا حمل بنرميه على غيرنا لما الظروف تتبدل
ربنا يكون في عون الطفل ده، ويعوضه عن كل لحظة وجع شافها من أقرب الناس ليه
ليست هناك تعليقات:
إرسال تعليق