أصعب غربة إنه يبقى قاعد جنب مراته وأولاده كل يوم…
لكن كل واحد في البيت حاسس إنه عايش لوحده.
كتب لكم المقااال 👇
بقلمى ✍️احمد حمدى مستشار علاقات دبلوماسية المجلس العربى الافريقى الدولى
ورئيس اللجنة العليا للصحافة والاعلام
يرجع من الشغل، يسلّم، ياكل، ويمسك الموبايل…
ولو اتفتح كلام، يبقى في حدود الضروري.
ومع الوقت…
البيت يبقى مجرد مكان للنوم.
مش مكان للونس.
ولا للحكايات.
ولا للمشاركة.
وده اللي ممكن نسميه “الزوج المغترب داخل المنزل”.
مش لأنه سافر…
لكن لأنه انسحب من العلاقة وهو لسه تحت نفس السقف.
لكن قبل ما نحكم عليه… لازم نفهم ليه ده بيحصل.
1- ضغوط الحياة ممكن تستهلك الإنسان.
فيه رجال شايلين مسؤوليات كبيرة، وبدل ما يحكوا اللي جواهم، بيختاروا الصمت.
يفتكر إن السكوت قوة…
لكن الحقيقة إن الصمت الطويل بيخلق مسافات، والمسافات لو طالت، المشاعر نفسها بتبرد.
2- العلاقة اتحولت لإدارة بيت فقط.
الكلام كله بقى عن الفواتير، والأولاد، والمصاريف، والمواعيد.
اختفت الضحكة…
واختفى السؤال البسيط:
“عامل إيه النهارده؟”
لما الزوجين يبطلوا يشوفوا بعض كزوج وزوجة، ويشوفوا بعض كشركاء مسؤوليات فقط…
العلاقة تبدأ تفقد روحها.
3- الشعور بعدم التقدير.
أحيانًا الزوج يحس إن كل اللي بيعمله بقى عادي.
ولو تأخر اتعاتب…
ولو تعب محدش سأل…
ولو نجح محدش شكره.
ومع الوقت يقرر ينسحب نفسيًا، لأنه شايف إن وجوده أو غيابه بقى واحد.
4- الشاشات سرقت البيوت.
الموبايل بقى يعرف عن يومه أكتر من أقرب الناس ليه.
ساعات طويلة مع الشاشة…
ودقائق قليلة مع الأسرة.
فبقينا ساكنين في بيت واحد…
لكن كل واحد عايش في عالم مختلف.
لكن برضه… مش كل المسؤولية على الزوج.
في بيوت، الزوجة كمان بقت مشغولة، أو مرهقة، أو فقدت الرغبة في الحوار بسبب تراكم الخلافات.
وفي بيوت، الطرفين انسحبوا من غير ما ياخدوا بالهم.
كل واحد مستني التاني يبدأ…
وفي الآخر الاتنين بيبعدوا.
الحقيقة إن الغربة داخل البيت مش بتبدأ فجأة.
بتبدأ برسالة اتأجل الرد عليها…
وبسؤال ماحدش جاوبه…
وبقعدة اتلغت…
وبكلمة حلوة اتبخلنا بيها.
لحد ما ييجي يوم، يكتشف الزوج والزوجة إنهم بقالهم سنين عايشين مع بعض…
لكن ماعادوش عارفين بعض.
البيوت مش بتنهار في يوم واحد…
هي بتبدأ لما يقل الكلام…
ويقل الاهتمام…
وكل واحد يعيش في عالمه الخاص.
وساعتها…
يبقى أصعب أنواع الغربة، إنك تكون مع أقرب الناس ليك…
وتحس إن بينكم آلاف الكيلومترات.
ليست هناك تعليقات:
إرسال تعليق