الكاتبة امل صالح سليم
لقاءات حقيقية لاشخاص مروا بتجارب
"مش كل قوة صح"
كانت دايمًا تقول:
"أنا بنت مدلعة… ومحدش يقدر يكسرني."
كبرت على إنها تتدلع، طلباتها أوامر، ورأيها ما يتراجعش…
ولما اتجوزت، دخلت بيتها بنفس الفكرة:
إن الجواز معركة لازم تكسبها… مش حياة تتبني.
في أول شهور، كل حاجة كانت عادية…
لكن مع أول اختلاف، ظهر اللي جواها:
"أنا مش أقل منك!"
"مش من حقك تقولّي أعمل إيه!"
"أنا مش خدامة عندك!"
كانت فاهمة إن طاعة الزوج ضعف…
وإن الاستئذان منه إهانة…
وإن الهدوء تنازل.
وجوزها؟
كان بيحاول يحتوي… مرة واتنين…
لحد ما بدأ يسكت.
وسكوته مكانش رضا…
كان انسحاب.
البيت اللي كان ممكن يتملي حب،
بقى مليان شد وجذب…
كلمة تقابلها كلمة،
وعناد يقابله عناد…
لحد ما بقوا عايشين تحت سقف واحد…
لكن قلوبهم بعيدة.
وفي يوم… وقفت قدام نفسها وسألت:
"هو أنا كسبت إيه؟"
لا هي حسّت بالأمان…
ولا هو حس بالراحة…
واكتشفت متأخر…
إنها كانت بتحارب الشخص الوحيد اللي المفروض يكون سندها.
💡 الحقيقة اللي فهمتها متأخر:
طاعة الزوج مش معناها انكسار…
لكنها نظام ربنا لحماية البيت.
زي ما الراجل عليه مسئوليات،
الست كمان عليها دور…
مش أقل… لكن مختلف.
البيت مش محتاج اتنين بيتنافسوا…
محتاج اتنين بيكملوا بعض.
والقوة الحقيقية…
مش إنك تكسبي كل نقاش،
لكن إنك تحافظي على بيتك.
❤️ الخاتمة:
مش كل اللي اتربينا عليه صح…
ومش كل قوة نتمسك بيها تنفع في الجواز.
في فرق كبير بين الكرامة… والعند.
بين الشخصية… والصراع.
ولو كل واحد فينا وقف عند "أنا"،
مفيش "إحنا" هتعيش.
ارجعي نفسك قبل ما تخسري اللي يستاهل…
وفهمي إن الطاعة مش ضعف…
دي حكمة… وسلام.
ليست هناك تعليقات:
إرسال تعليق