بنيت نفسي بنفسي

بقلم أستاذ/محمد جلال

محرر صحفي بجريدة الأنباء العربية الأفريقية الدولية

مسؤول الاتصال والإعلام بجريدة صوت الناس الحر

مراسل صحفي أخبار مصر اليوم

أنا ماوصلتش للي أنا فيه لأن الدنيا كانت سهلة، ولا لأن حد شالني وحطني في المكان اللي أنا فيه.

أنا بنيت نفسي بنفسي، خطوة ورا خطوة، وقعت وقومت، خسرت واتعلمت، واتخذلت وكملت طريقي.

مااعتمدتش على حد في بداية طريقي، ومااستنيتش حد ييجي ينقذني أو يفتحلي باب. اتعلمت إزاي أفتح الأبواب المقفولة بإيدي، وإزاي لما باب يتقفل في وشي أدور على طريق تاني بدل ما أقعد أشتكي.

أنا عارف كويس كل خطوة أخدتها كلفتني إيه، وعارف الليالي اللي كنت شايل فيها هم بكرة، والأيام اللي كان لازم أكون فيها قوي وأنا من جوايا محتاج حد يسندني.

وعشان كده، لما أشوف نفسي النهارده واقف على رجلي، مش بشوف نجاح وبس… أنا بشوف تعب سنين، وصبر، وتجارب، وقرارات صعبة، وأيام ماكانش فيها غير ربنا سند.

ومش معنى إني بنيت نفسي بنفسي إني بنكر فضل الناس اللي وقفت جنبي، بالعكس… اللي مد إيده ليا في وقت ضعفي عمره مايتنسي.

لكن الفرق إن أنا اللي شلت نفسي لما وقعت، وأنا اللي كملت لما الطريق طول، وأنا اللي فضلت مؤمن إن القادم ممكن يكون أحسن.

وعشان كده مش بخاف أخسر حاجة، لأني عارف إني أقدر أبدأ من الصفر تاني.

اللي بنى نفسه من الصفر، عمره ما يخاف من البداية من جديد.