بقلم أستاذ/محمد جلال
محرر صحفي بجريدة الأنباء العربية الأفريقية الدولية
مسؤول الاتصال والإعلام بجريدة صوت الناس الحر
مراسل صحفي أخبار مصر اليوم
إمشي في الحياة خفيف…
خفيف على قلوب الناس، خفيف في كلامك، خفيف في حضورك، وسيب وراك أثر طيب بدل ما تسيب وجع وذكريات صعبة.
متكسرش خاطر حد، لأن في قلوب بتتعب من كلمة أكتر ما بتتعب من ألف موقف.
ومتظلمش حد، لأن الظلم مهما طال وقته، عمره ما بيضيع.
ومتَرميش كلمة توجع وتقول "كنت بهزر"، لأن مش كل اللي بنهزره بيعدّي، وفي كلام بيفضل عالق في القلب سنين.
ومتتخلاش عن محتاج وأنت قادر تساعده، ومتستغلش طيبة حد لمجرد إنه وثق فيك، ومتعتبرش عفوية الناس وسماحتهم فرصة إنك تاخد أكتر مما تستحق.
الحياة مش بس فلوس وشغل ومكاسب… الحياة كمان أثر.
ممكن تكسب موقف وتخسر إنسان، تكسب مصلحة وتخسر ثقة، تكسب معركة وتخسر قلب كان شايلك في مكان كبير.
وعشان كده، حاول تكون إنسان لما الناس تفتكرك تقول:
"كان جدع… كان أصيل… عمره ما وجعنا."
افتكر دايمًا إن كل حاجة متسجلة ومكتوبة، وكل كلمة، وكل موقف، وكل دمعة كانت بسببك… ليها حساب عند ربنا.
والدنيا غريبة جدًا؛ ساعات الحاجة اللي عملتها في حد ترجعلك من نفس الباب، ويمكن في وقت تكون أنت فيه أكتر واحد محتاج الرحمة.
فمتأذيش علشان تقدر، ومتظلمش علشان أنت الأقوى، ومتستغلش حد علشان هو أضعف منك.
إمشي في الحياة خفيف…
اعمل الخير من غير ما تستنى مقابل، وارحم من في الأرض، وسيب حسابك عند ربنا.
لأن في النهاية، كل شيء بيرجع لصاحبه…
واللي بتزرعه في قلوب الناس، هتلاقيه يومًا ما في طريقك.
ليست هناك تعليقات:
إرسال تعليق