أعمل لنفسك غلاوة وخاطر،

كتب المقااال 👇

بقلم ✍️احمدحمدى مستشار علاقات دبلوماسية المجلس الافريقى الدولى  

مديرعام العلاقات العامة والاعلام رئاسة مجلس الوزراء 

في ناس من كتر طيبتهم وجدعنتهم، بيفتكروا

إنهم لما يرضوا اللي حواليهم.

إنهم كده هيكبروا في نظرهم، بس الحقيقة المرة اللي بنفوق عليها متأخر، هي إن اللي بيرخص نفسه عشان خاطر حد، أول حاجة بيخسرها هي خاطره عند الشخص ده، لما تلاقي نفسك دايماً إنت اللي بتسأل، وإنت اللي بتبادر، وإنت اللي بتخلق الأعذار، وإنت اللي بتعدي الغلطة والتانية والتالتة، اعرف إنك كده بتقلل من قيمتك.

اللي عايزك في حياته هيعرف يلاقيك ويخلق وقت عشانك، واللي شاري خاطرك بجد مش هيستنى لما تشتكي عشان يراضيك، لما تلاقيهم استسهلوا غيابك، غيب.. ولما تلاقيهم استخفوا بزعلك، أمشي من حياتهم.

لما تحس إن وجودك بقي تحصيل حاصل، انسحب بكرامة، نفسك أغلى ما تملك، متسمحش لحد يقلل منها، متخليش بابك مفتوح على البحري للي رايح واللي جاي، اعمل حدود، وأعرف أن الشخص اللي ملوش خاطر عند نفسه، عمره ما هيكون له لا خاطر ولا غلاوة عند الناس.