كتب لكم المقال 👇
بقلم ✍️احمد حمدى مستشار علاقات دبلوماسية المجلس الافريقى الدولى رئيس اللجنة العليا لتنظيم الاعلام
راجل يتولى مسؤوليتها حبًا فيها، مش تملكًا ليها.. يحتويها، مش يلغيها.. يقود بيته، مش يقود عليها.
لأن الست لما ترتبط براجل فظ وغليظ، طول الوقت بيحسسها إنها في معركة، وإن لازم تثبت إن ليها كلمة وإنها مش ضعيفة وإن محدش يقدر يكسرها.
وساعتها طبيعي تلاقيها بتتمسك بشعارات الاستقلال والقوة، مش لأنها مش محتاجة راجل، لكن لأنها مش حاسة بالأمان مع الراجل اللي معاها.
الست زي الآلة الموسيقية.. لو اللي ماسكها فاهمها وبيعرف يعزف عليها، هتطلع منها أجمل الألحان.. ولو بيتعامل معاها بعنف وعشوائية، هتسمع نشاز.
ونفس الست اللي بتكون طول الوقت عصبية، عنيدة، وبتحارب على كل حاجة.. ممكن جدًا مع راجل ناضج وذكي تلاقيها هديت، وبدأت تظهر أنوثتها وحنانها ودلعها.
مش لأنها اتغيرت لشخص تاني..
لكن لأنها أخيرًا بطلت تحس إنها محتاجة تدافع عن نفسها طول الوقت.
وفي رجالة بتفتكر إن رجولتها لازم تتثبت كل يوم:
أنا الراجل.
كلمتي هي اللي تمشي.
لازم تسمعي الكلام.
لازم أفرض سيطرتي.
مع إن الراجل الواثق من نفسه مش محتاج يفضل يثبت إنه الأقوى.
القيادة مش صوت عالي.
والقوة مش تعنيف.
والحزم مش إهانة.
والرجولة مش إنك تكسر اللي قدامك عشان تثبت إنك أقوى منه.
بالعكس..
الراجل اللي واثق في رجولته، مش هيتخانق مع مراته عشان يثبت إنه راجل، ومش هياخد كل انفعالاتها كأنها تحدي لشخصه، ومش هيعيش قماص مستني منها غلطة عشان يبدأ معركة.
هيطلب منها تكون أنثى، آه..
بس قبل ما يطلب منها ده، يسأل نفسه:
أنا وفرت لها الأمان اللي يخليها تعرف تكون أنثى؟
أنا حنين عليها؟
أنا بحتويها وقت ضعفها؟
أنا بديها إحساس إن في ضهر وسند؟
ولا كل اللي بقدمهولها أوامر وسيطرة وخناق؟
لأنك ماينفعش تطلب من الست تطمن لك، وإنت طول الوقت مخليها في وضع الدفاع.
والست كمان عليها مسؤولية..
الأمان مش معناه إنها تهين راجلها، ولا تتعمد كسر كلمته، ولا تستخدم أنوثتها للسيطرة عليه.
العلاقة الصحية مش معركة بين راجل وست مين يكسب فيها.
هي راجل وست، كل واحد فيهم عارف دوره، وبيحترم التاني، وبيسند التاني.
وأجمل حاجة ممكن تحصل في بيت إن الراجل يبقى قوي من غير قسوة، والست تبقى قوية من غير ما تضطر تتحول لراجل.
فالرجولة الحقيقية مش إنك تخلي مراتك تخاف منك.. الرجولة إنك تخليها مطمنة معاك.
ومتنساش إن الراجل الحنين رزق كبير لأي ست.. والست اللي تلاقي الأمان والاحتواء والرجولة الحقيقية، غالبًا هتكون أحرص واحدة على الحفاظ على الراجل ده. 🤍
ليست هناك تعليقات:
إرسال تعليق