كتب لكم المقااال 👇
بقلم ✍️ أحمد حمدى مستشار علاقات دبلوماسية المجلس الافريقى الدولى
ومدير علاقات عامة واعلام رئاسة مجلس الوزراء
اتخانقوا...
هي شتمته... هو ضربها...
سيناريو مؤلم جدًا... لكنه للأسف بقى بيتكرر في بيوت كتير.
الحقيقة إن أغلب الناس مش وحشة... بالعكس... في الأيام العادية بيبقوا محترمين، وطيبين، وبيحبوا بعض.
لكن المشكلة... إن في ناس وقت الغضب... بيتحولوا لشخص تاني خالص.
شخص يقول كلام عمره ما كان يقوله وهو هادي...
أو يعمل تصرف يفضل ندمان عليه العمر كله.
وفي ناس... لدرجة إن شريك حياتهم يبقى مرعوب من لحظة غضبهم.
وعشان كده...
حوارنا النهارده عن حاجة اسمها ضبط النفس... أو بالمسمى العلمي... الثبات الانفعالي.
اسمحلي أقولك شوية خطوات بسيطة... ممكن تمنع لحظة غضب من إنها تهد بيت كامل...🤔
⭐ أول حاجة... راقب نفسك. أول ما تلاحظ إن صوتك بدأ يعلى، أو قلبك بيدق بسرعة، أو أعصابك بتفلت... اعرف إنك دخلت منطقة الخطر.
ساعتها... أنهي النقاش بأي شكل محترم. لأنك لو كملت... غالبًا هتقول كلام هتندم عليه بعد ما تهدى.😮
⭐ ابعد عن المكان. اخرج من الأوضة... ولو تقدر خد دش بمية فاترة... أو اقعد لوحدك شوية. مش هروب... لكن فرصة ترجع تتحكم في نفسك قبل ما الغضب يتحكم فيك.👍
⭐ إياك تاخد قرار وأنت منفعل. لا قرار طلاق... ولا قرار انفصال... ولا حتى قرار يخص أولادك. القرارات اللي بتتاخد وقت الغضب... غالبًا بتكون أسوأ القرارات.😔
⭐ لو شريك حياتك غلط في حقك... متردش الغلط بغلط أكبر. لو أنت راجل... افتكر إنها أضعف منك... وإن رجولتك الحقيقية مش في إنك تقدر عليها... رجولتك في إنك تعرف تمسك نفسك.👋
ولو إنتِ ست... افتكري إن ده جوزك... وشريك حياتك... وإن كلمة واحدة ممكن تكسر جواه حاجة صعب ترجع زي الأول. كرامته من كرامتك... ومحدش يحب يعيش مع إنسان مكسور.😔
⭐ اعمل تمرين بسيط... لكنه فعّال جدًا. في وقت الصفا... هات ورقة وقلم... واكتب كل الصفات اللي بتحبها في شريك حياتك. اكتب المواقف الحلوة... والأيام اللي وقف فيها جنبك... واللحظات اللي حسسك فيها بالأمان. ولما تتخانقوا... ارجع للورقة دي. يمكن تفكرك إن اللي قدامك... مش مجرد غلطة... ده إنسان كان سبب في أجمل لحظات حياتك.👌
⭐ افتكر إن كلمة ممكن تهد سنين. في كلمة... بتنهي علاقة حب. وفي كلمة... بترجع قلب مكسور. وفي حضن صغير وسط الأزمة... ممكن يغني عن ساعات من الجدال... وأيام من الزعل.
افتكر... اللي بيتقال وقت الغضب... بيفضل محفور في القلب سنين.
واللي بيتكسر في لحظة... مش دايمًا بيكون سهل يتصلح.💔
علشان كده... قبل ما يسبقك غضبك... اسبقه أنت بالحكمة.
افتكر دايمًا... أخلاقك الحقيقية بتظهر وقت انفعالك... مش وقت ما تكون رايق ومبسوط. 🤍❤
🤲 اللهم ارزقنا حُسن الخلق، وضبط النفس، واجعل بيوتنا مليئة بالمودة والرحمة، وأبعد عنها الغضب الذي يهدم القلوب والبيوت.
وبفكرك دايمًا إن المحتوى الهادف بيموت بالمتابعة الصامتة..
. تعليقك ومشاركتك ممكن يكونوا سبب في إن الرسالة دي توصل لبيت محتاجها وتمنع من خراب البيت
ليست هناك تعليقات:
إرسال تعليق