كتب لكم المقااال 👇
✍️احمد حمدى مستشار علاقات دبلوماسية المجلس الإفريقي الدولى ورئيس اللجنة العليا للمجلس الاعلى للصحافة والاعلام
بص يا سيدي... ساعات بنصحى الصبح نلاقي نفسنا واقفين في نص الساقية والساقية دي بتلف بينا ومش عارفين مين اللي بيحركها
الحقيقة المرعبة إن اللي بيحركها هو الدائرة
اللي إنت اخترت تسكن فيها من غير ما تحس
إحنا مش عايشين في الدنيا دي وخلاص إحنا عايشين جوه دماغنا والدماغ دي
يا إما دائرة أفكار سلبية سودا بتسحبك لتحت
يا إما دائرة أفكار إيجابية بتشدك لفوق
تعال أحكيلك قصة هتلمس فيك حتة بتوجعك عشان تفهم إنت فين بالظبط
حكاية .. يونس والنداهة .. اللي جوه دماغه
يونس راجل زي وزيك شغال وبيسعى وعنده طموح يغير حياته.
في يوم من الأيام جاله عرض يدخل مشروع جديد فرصة عمره اللي كان بيتمناها
هنا... بدأت النداهة تشتغل
بس النداهة دي مكنتش برة
دي كانت دائرة الأفكار السلبية اللي محاوطاه
أول ما فكر في الخطوة حس بنغزة في قلبه
نغزة خفيفة بس بتوجع
فجأة دماغه بدأت تعرضله شريط أسود
تخيل لو خسرت كل فلوسك؟
الناس هتقول عليك إيه لما تفشل؟
إنت أصلا مش شاطر كفاي سيبك من الأوهام دي
يونس بدأ يحس بـخوف حقيقي
الخوف قلب معاه بـتوتر في كتافه ورقبتة مابقاش عارف ينام .....
كل ما يغمض عينه يشوف مشهد الفشل والكسرة يشوف نظرات الشماتة في عيون اللي حواليه الوجع مابقاش مجرد فكرة ده بقى ألم في جسمه وضربات قلب سريعة وغصة في حلقه مش عايزة تتبلع
من كتر القلق والضغط يونس خاف وانسحب
واعتذر عن الفرصة وقفل الباب.....
الوجع الأكبر.. دائرة العذاب المستمر
تفتكر يونس ارتاح لما هرب؟
بالعكس... هنا الألم الحقيقي بدأ
دخل في مرحلة جلد الذات
الأفكار السلبية مسبتوش لكنها غيرت القناع
وبقت تقوله شفت؟
إنت جبان.. عمرك ما هتوصل لحاجة..
إنت ضيعت حياتك
يونس بقى عايش في زنزانة ضلمة ...
والسجان فيها هو فكرته والكلبشات هي خوفه وقلقه
وهو عايش ميت بيتحرك زي الروبوت ...
خايف ياخد خطوة يقع
وخايف يقف فيفوت القطر
تخيل حجم العذاب لما تكون إنت ونفسك أعداء في نفس المكان؟
الأفكار السلبية بتخلق جوة قلبك زلزال ورهبة وخوف من المجهول وبتخليك دايما مستني المصيبة
الأفكار الإيجابية الإيمان والذكر والامل والتفاؤل
بتنزل على قلبك الطمأنينة
دي هي الحصن اللي بيخليك واقف ثابت وسط العاصفة مطمن إن ربنا معاك وإن لو الأبواب كلها اتقفلت باب ربنا دايما مفتوح
الذكر والافكار الايجابية وحسن الظن بالله هنا هو إنك تفكر نفسك دايما برحمة ربنا وقدرته فتكسر قيد الخوف
في النهاية اسأل نفسك إنت عايش فين دلوقتي؟
السؤال ده ليك إنت... ومحتاج إجابة صريحة مع نفسك
لما بيجيلك تليفون مفاجئ أو بتدخل على تحدي جديد في شغلك أو حياتك ... إيه أول سيناريو بيترسم في خيالك؟
لو كان السيناريو مليان خسارة ودموع وفشل ووحدة... فإنت بتعذب نفسك جوه الدائرة السلبية وبتدفع من صحتك وأعصابك تمن أوهام محصلتش أصلاً
ارحم قلبك وافتكر إن الخوف والقلق مش هيحموك من الفشل دول بس بيحرموك من إنك تعيش حياتك اخرج للنور وسيب الأفكار السودا تمشي واملا قلبك باليقين والطمأنينة... عشان تعيش بجد
الأفكار الإيجابية مش معناها إنك تنكر المشكلة معناها تشوف المشكلة بعين واقعية ومعاك يقين بالله إنك قادر تتعامل معها لان اي مشكلة بتنتهي وتضعف مع الوقت
يا تري سألت نفسك انت عايش جوه اي دائرة ؟؟؟؟؟؟؟؟ جاوب علي نفسك وما تهربش من الاجابة
يمكن كلمة واحدة من البوست ده تكون سبب إن حد قريب منك يخرج من دائرة الخوف والأفكار السلبية ❤️
ليست هناك تعليقات:
إرسال تعليق