كتب لكم الخبر 👇
بقلم ✍️
احمد حمدى مستشار علاقات دبلوماسية المجلس الإفريقي الدولى ورئيس المجلس الاعلى للصحافة والاعلام
حق الأستاذ محمود مش هيضيع.. ✅
اللي حصل مش مجرد خبر وفاه عادي، اللي حصل جثة وطن وأخلاق وهيبة اتدست بالأجزمة جوه حرم مدرسي!
إيه اللي حصل بالظبط؟
طالبة لا شافت تربية ولا تعرف يعني إيه أدب، هي ولا أهلها، نازلة من على السلم ممنوع البنات تنزل منه لأنه بيطل على مدرسة الأولاد. ولما الأستاذ محمود — الراجل الكبير اللي قد أبوها — وقفها وقالها ارجعي وانزلي من السلم التاني عشان يحافظ عليها وعلى النظام، الهانم أخدتها العزة باللثم وطلعت تلفونها وتستنجد بأهلها.. وكأنها بتنادي على بلطجية مش رايحين مدرسة!
جه الأب والأم ومعاهم شوية عيال بلطجية، اتلموا على راجل كبير بلغ من الكبر عتياً، نزلوا فيه ضرب وسحل لحد ما وقع على الأرض!
ولم يكفيهم كدة، الحريم كملوا عليه إهانة وضرب وهو مرمي مش قادر يدافع عن نفسه!
زمایلە شالوه بالعافية وقعدوه على الكرسي، ومفيش دقائق وكانت روحه طلعت للي خلقها.. مات من الكسر، مات من الإهانة، مات من الضرب!
عايزين تضيعوا حقه وتقولوا "هبوط حاد" و"سكر"؟!
طالعين شوية ناس يقولوا "أصل كان عنده السكر" و"أصل مات بهبوط حاد في الدورة الدموية"!
الكلام ده كذب ونفاق وتغطية على الجريمة!
أنا تواصلت بنفسي مع أهل الأستاذ محمود وأكدوا إنه معندهوش أي حاجة ولا بيشتكي من السكر نهائي!
وكذا مدرس حضر الواقعة وشاف بعينه شهدوا وقالوا: الراجل مات مضروب ومقهور!
ليه التغطية؟ وليه الطبطبة على القتلة؟
عاوزين تضيعوا حق راجل أفنى عمره في التعليم عشان شوية همج؟
اللي مات امبارح مش الأستاذ محمود بس
اللي مات هي الأخلاق والتربية.
اللي مات هو القانون وهيبة المعلم.
اللي طلع مكانهم هو البلطجة وقلة الأدب والعربدة!
وهنا لازم نقف ونسأل مديرة المدرسة والمشرفين ‼️
إزاي البنات داخلين بموبايلات اصلاً؟ وإزاي السور والأمن يتقفلوا وأسرة كاملة بالشباب بتوعها يدخلوا يقتحموا مدرسة ويهينوا مدرس في قلبه وفصله؟ فين الحرم المدرسي وفين الأمن؟
عيلة افتكرت إنها أقوى من القانون، جاية تتفرد بضوافرها على مدرس في مدرسته.. لازم الكل يتحاسب الطالبة القليلة الأدب، وأبوها، وأمها، وكل بلطجي حط إيده على الأستاذ، ومعاهم إدارة المدرسة المقصرة!
مش هنسكت ومش هنحط رأسنا في الرمل.. ، بنطالب النهاردة بحق الأستاذ محمود.
أتمنى من كل واحد يقرأ الكلام ده يوصل البوست ويعمل شير على أوسع نطاق.. البوست ده لازم يلف مصر كلها ويبقى قضية رأي عام عشان حق الراجل الطيب ده يرجع والقتلة ياخدوا جزاءهم!✅
معلم اللغة العربية بمدرسة على مبارك الإعدادية بنات بديروط
نرجو من الأجهزة الأمنية وسير التحقيقات بالنيابة العامة سرعة فحص البلاغ واتخاذ الإجراءات القانونية اللازمة، والتحقق من الواقعة والتحري عنها بدقة وسماع شهادة المعلمين الحاضرين، وضبط كل شخص حال ثبوت ارتكابه لهذه الجريمة البشعة.
الصفحة الرسمية لوزارة الداخلية
Egyptian Public Prosecution النيابة العامة المصرية
رئاسة مجلس الوزراء المصري‼️🇪🇬
ليست هناك تعليقات:
إرسال تعليق