ولاد الأصول عمرهم ما يتغيروا

بقلم أستاذ/محمد جلال

محرر صحفي بجريدة الأنباء العربية الأفريقية الدولية

مسؤول الاتصال والإعلام بجريدة صوت الناس الحر

مراسل صحفي أخبار مصر اليوم

مفيش حاجة اسمها «فترة البدايات» وإن الإنسان بيكون كويس في الأول وبعد كده بيتغير.

الناس الكويسة بجد بتفضل كويسة، مش يوم ولا شهر ولا سنة… حتى لو عدى 100 سنة.

ولاد الأصول مش بيعملوا حاجات حلوة علشان يسيبوا انطباع، ولا بيقفوا جنبك علشان مستنيين منك مقابل، ولا بيحترموك طول ما هما محتاجينك.

الأصل بيبان في المواقف، والجدعنة بتبان وقت الشدة، والأخلاق بتبان لما الإنسان يبقى قادر يعمل عكسها ومابيعملش.

ممكن الإنسان يتغير في ظروفه، في تفكيره، في طريقته، وحتى في الأشخاص اللي حواليه… لكن أصله الحقيقي بيفضل ثابت.

وعلشان كده متصدقش كل اللي يقولك: «أنا اتغيرت».

أحيانًا اللي اتغير مش الإنسان… اللي اتغير هو القناع اللي كان لابسه.

الوقت مش بيغيّر الناس، الوقت بيكشفهم.

وفي المقابل، هتلاقي شخص مهما بعدت الأيام، ومهما قلت المقابلات، ومهما اتغيرت الظروف، لما تحتاجه هتلاقيه هو هو… نفس الجدعنة، نفس الاحترام، ونفس القلب.

دول بقى ولاد الأصول.

ولاد الأصول عمرهم ما يتغيروا… لأن الأصل مش فترة بدايات، الأصل طبع عايش مع صاحبه طول العمر.