بقلم /المستشار فادي ماهر فكتر ومحرر صحفي بجريده الانباء العربيه الافريقيه الدوليه
خيانة قدام طفلة صغيرة.. مشهد يوجع القلب: “يلا البسي عشان هننزل”
فيديو متداول خلّى ناس كتير تقف قدامه مش عارفة تتكلم من هول المشهد..
زوج اكتشف إن زوجته بتخونه، فقرر يواجهها، لكن المواجهة تحولت لمشهد قاسي جدًا، وظهر في الفيديو وهو يعتدي عليها، وسط صراخ وبكاء، ودم ظاهر من فمها.
لكن الحكاية ماوقفتش هنا..
الزوج فتح موبايل زوجته وبدأ يصورها، وطلب منها تفتح تطبيق واتساب، عشان يشوف الرسائل اللي بينها وبين الشخص اللي بيتردد إنه عشيقها، وبدأ يصور الرسائل بنفسه.
كل ده كوم.. وصوت طفلة صغيرة بتعيط في الخلفية كوم تاني خالص!
طفلة لسه صغيرة، مش فاهمة إيه اللي بيحصل، ولا ليه بابا بيضرب ماما، ولا ليه البيت اللي المفروض يكون أكتر مكان آمن بالنسبالها اتحول فجأة لمكان مليان صراخ وخوف ودموع.
والأب، وسط كل اللي بيحصل، بيحاول يهدي بنته وبيقولها:
“يلا البسي عشان هننزل.”
مشهد يمكن ينتهي بانتهاء الفيديو.. لكن تأثيره على طفلة صغيرة ممكن يفضل جواها سنين طويلة.
الخيانة وجع.. والطلاق وجع.. لكن الأصعب من الاتنين إن أطفال مالهمش ذنب يعيشوا وسط أب وأم كل واحد فيهم شايل كراهية للتاني.
يا جماعة.. الجواز مش لعبة، والخيانة مش حل.
لو اتنين وصلوا لمرحلة إنهم مش قادرين يكملوا مع بعض، فالانفصال باحترام أرحم بكتير من الخيانة، والعنف، والفضايح، وتحويل البيت لساحة حرب.
*اتطلقوا لو مش قادرين تكملوا.. لكن ماتدمروش نفسية أولادكم بسبب خلافاتكم .
ليست هناك تعليقات:
إرسال تعليق