احزمة الزلازل المعروفة في العالم كله ٦ احزمة منهم اتنين هما اكبر حزامين واحد اسمه حزام المحيط الهادي اللي ناحية اليابان واندونيسيا والتاني اسمه حزام جبال الالب اللي بيعدي من البحر المتوسط بس مبيعديش من مصر.
انت بتحس بالزلازل عشان مصر قريبة من الدول اللي عند حزام الالب وفي النص بالظبط واللي بيحصل فيهم زلزال كل يوم تقريبا زي تركيا وقبرص واليونان مجرد بتحس بيهم بس.
الزلازل بتتقاس بالريختر مش بالريتش ولا الريلز ولا بالهبد ؟
حزام الزلازل دي مش مرحلة "مصر" مرشحة ليها ولا هتدخلها بالتصفيات ولا بالاجتهاد انما دي حاجة من ايام ما القارات زمان انفصلت عن بعض وبقوا لامؤاخذة صفايح "تكتونية".
الزلازل الكتير دي مش حاجة جديدة على مصر او على كوكب الارض عموما فحاول تتعايش مع فكرة انك كل كام يوم هتحس بهزة ارضية مرة خفيفة مرة اشد سيكا المهم انها تكون محسوسة بس متوقعلهاش بلكونتين في السكة.
عداد الفولورز لا يجعل منك عالم جيولوجيا انما يجعلك شخص اتنشن.
التسو.نامي عشان يكون مد.مر محتاج مياة مفتوحة محيط مثلا يعمل موجة عالية ويخش علي السواحل انما احنا سواحلنا ميتها شبة مغلقة اكبر موجة ممكن تحصل مش هتعدي الخمسة متر فأغلب اللي بيخوفكوا دول ناس مدرسوش جيولوجيا في ثانوية عامة وشويه عيال بيعملوا محتوى وريتش على قفاكم..؟
لو خايف اوي من الزلازل متخافش يا حبيبي الواحد ممكن زتونة وسط الاكل تقف في زوره تموتك ولا زلزال ولا بركان وعندك اليابانيين اهم في قلب حزام الزلازل وكل خمس ايام تسونامي ومضر.وبين قنبل.تين نو.وي وبيعملوا احلى انمي ومانجا ومتسوبيشي لانسر ولا فارقلهم.
مش كل حاجة نقول سلا.ح "ها.رب" بكرر مش كل حاجة تحصلنا نقول سلا.ح ها.رب والكيمتريل بمرتبك اللي ميجبش كيلو طرب ده.
لو حصل زلزال مد.مر في يوم من الايام مظنش ان فيه حد هيكون فاضي يكتبلكم بوست او يعملكم فيديو عنه عشان يحقق الربح فأنت ما عليك غير انك تكون مستعد يعني تكون عارف شايل الدهب فين ونايم بالنطلون ومصلي الفجر والحاجات الجميلة دي.
وفيه ناس اعرفها محستش بولا زلزال من اللي فاتوا ونص الناس كمان محستش بس فتحت الفيس لقت الكلام على زلازل قالت تشارككم الاحساس وكدة وبقول نص مش كل لان فيه ناس حست عادي.
احفظ الكلمتين دول وشكرا .. بقلم عاشقة الوطن سحر غانم
ليست هناك تعليقات:
إرسال تعليق