كتب لكم المقااال بقلم ✍️احمد حمدى مستشار علاقات دبلوماسية المجلس العربى الافريقى الدولى
ورئيس اللجنة العليا للصحافة والاعلام
بنقضي نص يومنا بنرد على سؤال: "عامل إيه؟" بكلمة "كله تمام".. بس من جوانا، بيكون في "تمام" تانية خالص. تمام مليانة كركبة أفكار، وخوف من بكرة، وتعب متراكم من حاجات محدش يعرف عنها حاجة.
الخوف الحقيقي مش من الوجع، الخوف من إننا لو قلنا "أنا مش بخير" نتشاف ضعاف، أو نتحمل فوق طاقتنا لوم وعتاب، ويمكن يكون خجل من إننا نقول إننا مش كويسين!
في #فضفصة_مع_غادة حابة أقولك: طبيعي جداً متكونش بخير، وطبيعي تحتاج تفصل، وطبيعي متبقاش السوبر مان اللي بيحل مشاكل المجرة. الاعتراف بالتعب هو أول خطوة حقيقية للشفاء.
💡 نصيحة من القلب لقلبك:
السكوت المؤذي مش شطارة، وإنك تيجي على نفسك عشان تبان قوي قدام الناس ده مش انتصار.. دي "جناية" بتعملها في حق نفسك كل يوم.
افتكر دايماً: الناس هتعاملك بناءً على الكتالوج اللي أنت بتديهولهم عن نفسك. لو صدرت ليهم إنك السوبر مان اللي مبيشتكيش ويستحمل أي حاجة، هيتعاملوا معاك على إنك مابتتعبش، ولما تقع مش هتلاقي اللي يشيلك.
خطوتك الأولى النهاردة:
بطل دور البطل الخارق في حياة الكل وأنت مكسور من جواك. لو مش قادر تقول للناس "أنا مش بخير".. قولها لنفسك الأول، واعترف بتعبك، واقفل باب أوضتك وافصل.. لأنك لو منهرتتش في الوقت المناسب عشان ترتاح، جسمك وصحتك النفسية هينهاروا في وقت أنت مش مستعد ليه.
👇 شاركوني في التعليقات:
إيه أكتر حاجة بتخافوا منها لو قررتوا تظهروا تعبكم ومشاعركم الحقيقية قدام القريبين منكم؟
ليست هناك تعليقات:
إرسال تعليق