*بقلم: إيناس* عماد*
قاعة الحكمة مسرح ساقية الصاوي امبارح ما كانتش قاعة.
كانت بيت كبير، كله قاعد على قلب واحد، وبيضحك بصوت واحد، وبيسقف من قلبه.
*كامل العدد*، وكامل المتعة
*"ميدو جاب آخره"* مش عرض وخلاص. دي ساعتين اتغسل فيهم الهم بالضحك. كوميديا رائعة من غير تصنع، توصل في الآخر لجملة واحدة محفورة: *الهروب مش هو الحل*. اتقالت واحنا بنضحك، ووصلت واحنا بنفكر.
الأبطال شالوا المسرح على كتافهم:
*عبد السلام الدهشان* بثقله الفني، *ميدو مزيكا* بطاقته اللي بتعدي، *كارمن سالم، هبة غندر، بلال الشاعر، نسمة عادل، عمرو عبد اللطيف، مروة الخولي، نيفين الكردي، سندس سامي، بسمة حفني، أحمد إبراهيم، شيما*
والمفاجأة اللي خطفت القلوب:
*رجب حامد* اللي أبدع في دور الأب في وقت قياسي. دخل الشخصية بقلب، وطلع منها بدموع الناس قبل ضحكهم. شابو ليك.
*ولولا الناس دي... ماكانش العرض طلع كده:*
*تأليف: نسرين التونسي* كتبت بضحكة ووجع
*مساعد مخرج: سلمى سيد* عين ما بتنامش
*إخراج: محمد التونسي* اللي بيعرف يصنع الجديد كل مرة ومنتظرين كل جديد.
*والمخرج المنفذ: محمد عبد الفتاح*
كلمة ليك من القلب: تعبك باين. السهر، الجري، التفاصيل الصغيرة اللي محدش شايفها بس هي اللي خلت العرض يطلع بالشكل ده. انت الضهر اللي شال، والإيد اللي ظبطت. شكراً إنك آمنت إن "ميدو" يستاهل يطلع كامل.
*والوجه الخفي اللي وصل الصوت:*
*دعايا وميديا: أحمد الجوهري*
الجمهور خرج مبهر. مش بس عشان ضحك... عشان حس إن في مسرح لسه بيحترمه وبيكلمه.
اللي فاته العرض، فاته درس في الضحك والجد مع بعض 🎭
ليست هناك تعليقات:
إرسال تعليق