التصالح مع النفس مش رفاهية… ده ضرورة عشان تعرف تعيش مرتاح.
يعني إيه تتصالح مع نفسك؟ يعني تبقى قابل نفسك زي ما إنت، بعيوبك قبل مميزاتك، بأخطائك قبل نجاحاتك. تبطل جلد ذات، وتدي لنفسك فرصة تبدأ من جديد من غير ما تفضل شايل هم الماضي فوق كتافك.
كتير مننا عايشين حرب جواهم… صوت بيقولك “إنت قصّرت”، وصوت تاني بيقولك “كان ممكن تعمل أحسن من كده”. وتفضل داير في الدايرة دي لحد ما تتعب. بس الحقيقة إن مفيش حد كامل، وكلنا بنغلط، والغلط مش نهاية الطريق… ده جزء طبيعي من الرحلة.
التصالح مع النفس بيبدأ من إنك تعترف بمشاعرك من غير إنكار. لو زعلان قول أنا زعلان، لو موجوع اعترف بده. الهروب مش حل، والتجاهل عمره ما كان علاج. لما تفهم نفسك وتسمعها، ساعتها بس تقدر تحتويها.
ومن أهم خطوات التصالح إنك تسامح نفسك… آه تسامحها على قرارات غلط، على اختيارات ما كانتش في محلها، على وقت ضاع. لأنك وقتها كنت بتتصرف على قد فهمك وإمكانياتك. ماينفعش تحاكم نفسك دلوقتي بعقلية وخبرة ماكنتش عندك زمان.
كمان لازم تبطل تقارن نفسك بحد. كل واحد له رحلته، وله توقيته. اللي نجح بدري مش أحسن منك، واللي اتأخر مش أقل منك. المقارنة بتظلمك، وبتخليك شايف نفسك دايمًا ناقص… مع إنك ممكن تكون ماشي صح بس بطريقتك.
التصالح مع النفس معناه إنك تدي لنفسك راحة… تبطل ضغط، تبطل قسوة، وتتعلم تقول “كفاية كده النهارده”. مش لازم كل يوم تبقى مثالي، كفاية إنك بتحاول.
ولما تتصالح مع نفسك… هتلاقي نظرتك للدنيا اتغيرت. هتبقى أهدى، أرحم، وأقوى. هتعرف تختار صح، وتبعد عن أي حاجة بتوجعك من غير تأنيب ضمير. لأنك ببساطة بقيت فاهم نفسك ومقدّرها.
في النهاية…
اللي بينك وبين نفسك أهم من أي علاقة تانية. لو العلاقة دي سليمة، كل حاجة تانية هتظبط.
اراضي نفسك… عشان هي أولى بيك من أي حد.
د/ إسلام محمد
استشارية نفسيه واسرية ودكتوراه في التنميه البشريه وتطوير الذات وعضوة بمنظمه حقوق الإنسان المصريه ورئيسه لجنة الصحة النفسية بوزارة الشباب والرياضة وصاحبه كتابي البحث عن الذات و كتاب طوظ
ليست هناك تعليقات:
إرسال تعليق