يا صاحب المِنبر.. وصوت الجماعة
يا لابس عباية.. ورِقّة ووداعة
صيامنا وعِدنا.. وحكمة مَعادنا
حفظناهم خلاص.. بـشطارة وبـبراعة!
يا مولانا اسـمع.. لـدبّ الشوارع
وقول للّي صـلّى.. وفـِ النهب بـارع
إن العـبـادة.. مـاهيـاش "مـنظرة"
ولا دقن طـولـت.. وعـامل مـزارع!
وقول للضباط.. للبيوت حُرمات
ومش بالرُتب.. تـعدي الأزمات
الظلم ظُلمة.. والـحق مـش هـين
يوم الحساب.. مـا تـنـفع الـبـاشـوات!
وقول للّي غايه.. فـ كـرسي ومـقام
وعـامل كـبـير.. وبـتاع الأفـلام
لا ضابط هـيـنفع.. ولا حتى أمـير
لما الـمظالـم.. تـصحي وتـقـام!
وقول للّي "شـاهِد".. بـالـزور والـكـدب
وبـكلمة بـاطل.. بـيـهد إرب بـإرب
بـاع الـضمير.. بـفـكة ونـحاس
ومـش خـايف أبـداً.. م الحساب والضرب!
يـا حـالف كـدب.. فـي مـحكـمة وعـلني
وعـامل لـنفسك.. "ولـي" بـيـبـهـرني
صيامك "هـوا".. وكـلامك "ذنـوب"
وشـهادة الـزور.. دي نار بـتـكـوي!
وقول للّي فـِطره.. من "مال الحرام"
يا "هبّاش" كـبـير.. وبـتاع الأفـلام
لا صلاة نافعة.. ولا ركعة شـافعة
طالما فـِ كرشك.. لـقمة الأيـتام!
وقول للّي صايم.. في بيت مش بتاعه
ونـاهب حقوق الناس.. بـلوية ذراعه
صيامك "يا حلو".. مالوش عِندنا صرف
زي اللي بيبيع.. الـهوا فـي بـطـاعه!
وقول للي "حـابـس".. مـيراث الـولايا
وعامل لـنفسه.. تـقـي في الـزوايا
ده ربنا "عدل".. وقاضي القضاة
ومـش بـالتراويح.. تـداري الـبلايا!
وقول للي "خـسّس".. ومـوّت ضـميره
وسـرق الـغـلابة.. فـِ مـيزان جـرجيره
يا عمّنا الشيخ.. عـرّفـهُم يـا سـيدي
إن "الـميزان".. هوّ سـيرتي ومـصـيري!
والمسحة ع الكفة.. دي فيها حـساب
وتـقفل في وشك.. مـيت ألف بـباب
لو خـان الـبـايع.. فـي "هبابة" جـرام
يـضيع الـصيام.. ويـبقى الـثواب سـراب!
وقول للي "خـازن".. أكـل الـعيـال
وبـيتاجر بـجوعنا.. فـي عـز الليـال
إن "الاحتكار".. ده سـم فـي بـدنـا
ومالـهوش دوا.. بـدُعا وابـتهال!
وقول لـلمـنظم.. وريـس الـقـرية
اللي مـقضيها.. نـبر وهـريـة
يـهد بـيت الغـلـبان.. بـقـلب جـامد
ويـسـيب "الـحيتان".. تـبني بـحرية!
عشان "الـرشاوى".. والـجـيب الـمفتوح
بـيـغمض عيونه.. والـغـلبان يـانوح
الـبـيت اللي اتبـنى.. بـشـقا الـعُمر
تـسوّيه بـتـراب.. وتـطـلع الـروح!
وقول للّي "داير".. يـهـتك في الأعراض
وعـيـنه فـي بـنات الناس.. أمـراض في أمـراض
الـطهر مـش "دقـن".. ولا "مـسبحة"
الـطهر نـفـس.. م الـخيانة مـا تـعـراض!
يا شيخنا قـولـهم.. "الـدين مـعاملة"
مش "سـبحة طـويلة".. وحـركـات كـاملة
قـولـهم عـن الجار.. وحـق الطـريق
وعن الأمانة.. اللي ضاعت كـاملة!
يا عمّنا الـشيخ.. الـقائمة طـويلة
والـنفس أمّـارة.. والـحيلة قـليلة
لكن "الحقوق".. مـا فيـهاش "سـماح"
رد الـمظالم.. هوّ "الـفضـيلة"!
خـلّي الصلاة.. تـبـني الـضـمير
وتـرد حق.. الـغلبان والـفـقير
وعـلّي صـوتك.. بـحق ربنا
يـمكن تـتـوب.. نـفـس الشـرير!
لعلكم تتقون..
ولا غالب إلا الله.
كلمات: أحمد المهدي صفوت
ليست هناك تعليقات:
إرسال تعليق