اللي يتغير من غير سبب.. يتساب من غير عتاب

بقلم أستاذ/ محمد جلال

محرر صحفي بجريدة الأنباء العربية الأفريقية الدولية

مسؤول الاتصال والإعلام بجريدة صوت الناس الحر

مراسل صحفي أخبار مصر اليوم

مش كل واحد اتغير عليك يستاهل إنك تسأله مالك، ولا كل واحد بعد عنك لازم تجري وراه علشان تعرف السبب.

في ناس بتتغير فجأة، من غير خلاف ولا موقف ولا حتى كلمة زعل، تلاقي الاهتمام اختفى، والسؤال قل، والمعاملة بقت غريبة، وكأنك بقيت شخص تاني في حياتهم.

والحقيقة إن أصعب حاجة مش التغيير نفسه، لكن إنك تفضل تدور على غلطة إنت معملتهاش، وتحاسب نفسك على تقصير محصلش.

بس لازم تعرف إن مش كل تغيير محتاج تفسير، ومش كل غياب يستاهل عتاب.

إحنا مش مطالبين طول عمرنا نجري ورا الناس، ولا نفضل نثبت قيمتنا لحد كان في يوم عارفها كويس.

العتاب له ناسه، والاهتمام له أصحابه، واللي عايز يحافظ عليك هيلاقي ألف طريقة يطمنك، مش ألف حجة يبعد بيها عنك.

وأحيانًا السكوت مش ضعف، والبعد مش قسوة، لكن بيكون احترام لنفسك بعد ما استنفدت كل محاولاتك.

خليك عزيز النفس، مش كل اللي يمشي وراك لازم تنادي عليه، ومش كل اللي يتغير لازم ترجعه زي الأول.

وفي النهاية، اللي وجودك فارق معاه مش هيسيبك محتار في مكانتك عنده، واللي اختار البعد من غير توضيح، من حقك تختار راحة بالك من غير عتاب.

لأن اللي يتغير من غير سبب.. يتساب من غير عتاب، واللي يهون عليه وجودك، ميستاهلش إنك تتعب نفسك علشان غيابه.