كتب بقلم ✍️احمدحمدى مستشار علاقات دبلوماسية المجلس الافريقى الدولى ورئيس اللجنة العليا للصحافة والاعلام
شوفت ست عايشة قدام الناس، بتتكلم وبتضحك وبتقضي يومها عادي، بس لو بصيت جواها هتلاقي روحها انطفت من زمان!
الست بتموت وهي عايشة لما ضحكتها تختفي، ولما تبطل تهتم بنفسها، ولما ماتستناش حنية من حد، ولا تستنى إيد تطبطب عليها، ولا حضن يهون عليها وجعها.
بتموت لما تسمع كلام الحب ومابقاش قلبها يهتز، ولما بدل ما تفرح بكلمة حلوة تبتسم بسخرية، كأنها بتقول: الكلام ده مبقاش يفرق معايا!
في ستات بتدفن وجعها جواها، وتعلن الحداد على أحلامها من غير ما حد يحس بيها، وبعدها تقوم تغسل وشها، وتظبط هدومها، وتحط كحل في عينيها، وتنزل تضحك في وش الدنيا كأن مفيش حاجة حصلت!
بس الحقيقة إن جواها ألف وجع، وألف خذلان، وحاجات كتير ماتت فيها ومارجعتش تاني.
أصعب ست مش اللي بتعيط قدامك.. أصعب ست هي اللي بطلت تعيط، وبطلت تعاتب، وبطلت تطلب، وبقت تقولك: أنا كويسة، وهي من جواها مابقاش فيها حيل لأي حاجة!
خلي بالكوا من الست اللي كانت بتضحك من قلبها وبقت ساكتة، واللي كانت بتحلم وبقت مش فارق معاها بكرة، واللي كانت بتجري على اللي بتحبهم وبقت مش مستنية حد.
لأن ساعات انطفاء العين مش بيكون من التعب.. ده بيكون من كتر الوجع اللي القلب شاله لوحده. 💔🥀
ليست هناك تعليقات:
إرسال تعليق