بقلم/ امل صالح سليم
في رجالة بتتكلم عن النشوز وكأن الزوجة متهمة مطلوب تأديبها
وبتلومها لأنها لجأت للمحاكم وكأنها اختارت الحرب من غير سبب
لكن الصدمة الحقيقية لما تلاقي الراجل اللي بيتكلم عن الأدب والاحترام هو نفسه اللي بيستخدم ألفاظ جارحة وأسلوب عدواني في مجرد حوار عادي
طيب لو ده أسلوبك وانت بتتكلم قدام الناس ومن غير خلاف زوجي ولا مسؤوليات بيت ولا ضغوط حياة أمال أسلوبك بيكون عامل إزاي وانت جوه بيتك ومعاك ست مفيش حد شايف اللي بيحصل بينها وبينك
قبل ما تتهم زوجتك بالنشوز اسأل نفسك هل كنت زوج يحتوي ولا شخص يكسر وهل كنت بتتحاور معاها ولا بتفرض عليها رأيك بالصوت العالي والتهديد والإهانة
مش كل ست صوتها بيعلى تبقى قليلة الأدب ومش كل ست راحت المحكمة تبقى بتدور على خراب بيتها
في ستات بتسكت سنين مش احتراما للي بيحصل لكن خوفا على أولادها وعلى بيتها وعلى كلام الناس وفي ستات بتوصل للمحكمة بعد ما تكون استنفدت كل محاولات الصبر والإصلاح
والأخطر إن بعض الرجالة عايزين الزوجة تتحمل الإهانة وتسكت وتطيع من غير نقاش ولما تنهار وتطالب بحقها يتهموها بأنها السبب في خراب البيت
يا سيدي البيت مش محكمة وأنت مش قاضي والزوجة مش متهمة لمجرد إنها اختلفت معاك أو رفضت الإهانة
الرجولة مش إنك تأدب ست ولا إنك تكسر صوتها الرجولة إنك تعرف تحترمها حتى وقت الخلاف
والطلاق مش دايما دليل إن الست هدمت بيتها أحيانا بيكون النتيجة الأخيرة لسنين من المعاملة اللي هدمت البيت من جوه قبل ما يتقال رسميا إن العلاقة انتهت
وقبل ما تسأل ليه الستات بقت تجري على المحاكم اسأل نفسك سؤال أصعب
هو كام راجل خسر مراته بإيده وبعدين وقف قدام الناس يحكي إن هي اللي ضيعت البيت
ليست هناك تعليقات:
إرسال تعليق