كتب لكم المقال 👇
بقلم ✍️احمد حمدى مستشار علاقات دبلوماسية المجلس الافريقى الدولى رئيس اللجنة العليا لتنظيم الاعلام
اصعب حاجة على الست مش انها تتعب من جوزها
اصعب حاجة انها تتعب منه ومن ولادها ومن البيت اللي عايشة فيه وفي الاخر تلاقي نفسها هي الغريبة
تدخل الجواز وهي سايبة اهلها وبلدها وراها وتقول
هبدا حياتي مع الانسان اللي اخترته
تروح بلده وتعيش وسط اهله وفي بيت عيلته وتبدا واحدة واحدة تتنازل عن حاجات كتير عشان المركب تمشي
تسكت على كلمة
وتعدي موقف
وتقول معلش
وتقول عشان البيت
وتقول عشان الولاد
لحد ما تصحى في يوم تلاقي انها بقت بتدفع تمن كل حاجة لوحدها
جوزها مش بيفتكرها غير وقت ما يكون عايز العلاقة حتى لو هي تعبانة مكسورة عندها ظرف قهري او نفسها مش مستعدة
وبعدها
يرجع لحياته عادي
وكان مشاعرها ملهاش لازمة
يا جماعة الجواز مش ان الراجل يفتكر مراته وقت ما جسمه يحتاجها وينساها وقت ما قلبها يحتاجه
الست مش باب بيتفتح وقت الرغبة ويتقفل بعدها
دي واحدة عايزة تحس انها متشافة
متقدرة
مسموعة
ومحترمة
والعلاقة اللي مفيهاش رضا ومراعاة ورحمة بتتحول مع الوقت من قرب بين اتنين لحاجة بتوجع واحد فيهم
وبعدين تيجي المشكلة الاكبر
الولاد
الولد بيتعلم من اللي بيشوفه اكتر بكتير من اللي بيتقاله
لو شاف ابوه بيتعامل مع امه بقسوة او اهله بيتعاملوا معاها كانها واحدة غريبة ممكن يبدا ياخد نفس الطريقة من غير ما يحس
خصوصا لما الام تكون جاية من بلد تانية وعايشة في بلد الزوج ووسط عيلته
ساعتها المعركة مش بتبقى بينها وبين جوزها بس
دي ممكن تبقى واحدة لوحدها قدام بيت كامل
بس هنا لازم اقول للست كلمة يمكن تكون اهم كلمة في الحكاية كلها
اوعي تفتكري ان سكوتك الطويل معناه انك ضعيفة
انتي سكتي عشان تحافظي على بيتك
استحملتي عشان ولادك
عديتي حاجات كتير عشان متكبريش المشاكل
وده يحسبلك
لكن متخليش صبرك يتحول لسجن
انتي مش مطالبة تكرهي جوزك
ولا تعادي اهله
ولا تربي ولادك على الكراهية
لكن مطالبة بحاجة واحدة
متخسريش نفسك وانتي بتحاولي تحافظي على كل حاجة
اتعلمي تقولي لا من غير ما تحسي بالذنب
اتكلمي عن وجعك بدل ما تدفنيه
حطي حدود من غير خناقة
وخلي ولادك يعرفوا ان احترام امهم مش مجاملة ده اصل من اصول البيت
ولو يوم حسيت ان كل اللي حواليكي بيعاملواكي كانك مالكيش قيمة
افتكري ان قيمتك مش بتتحدد بمعاملة الناس ليكي
انتي قيمتك موجودة قبل جوزك وقبل ولادك وقبل البيت ده كله
فوقي لنفسك
مش معنى انك ست انك تستحملي كل حاجة
ومش معنى انك ام انك تدفني نفسك عشان ولادك
ومش معنى انك بتحبي جوزك انك تقبلي ان كرامتك تبقى تمن الحب
انتي مش ضيفة في بيتك
ومش خادمة لزوجك
ليست هناك تعليقات:
إرسال تعليق