ربنا ما يحوجنا لحد

بقلم أستاذ/محمد جلال

محرر صحفي بجريدة الأنباء العربية الأفريقية الدولية

مسؤول الاتصال والإعلام بجريدة صوت الناس الحر

مراسل صحفي أخبار مصر اليوم

ربنا ما يحوجنا لحد…

لأن الاحتياج مش دايمًا بيكون في فلوس، ساعات بتحتاج كلمة، وقفة، سند، أو حتى شخص تحس إنك تقدر تلجأ له وقت ما الدنيا تضيق عليك.

والأصعب من الاحتياج نفسه، إنك تحتاج شخص مش مقدّر احتياجك، فتلاقي نفسك بتبرر له، وتستحمل منه، وتسكت عن كلام يوجعك، لمجرد إنك عارف إنك محتاجه.

ممكن إنسان عزيز على نفسه جدًا، لكن الظروف تحطه في موقف يخليه يقول كلام عمره ما كان يتخيل إنه هيقوله، أو يطلب حاجة كان نفسه يفضل طول عمره قادر يوفرها لنفسه.

وعشان كده ما تحكمش على حد من لحظة احتياجه…

لأنك مش عارف هو كان بيقاوم إيه قبل ما يمد إيده.

الاحتياج بيكشف معادن الناس؛ فيه ناس لما تحتاجها تحس إنك حمل عليها، وناس تانية تخليك تحس إنك بتطلب حقك مش بتطلب فضلهم.

وعشان كده دعاؤنا مش إننا نبقى أغنياء عن كل الناس، لكن إن ربنا يرزقنا الكفاية، ويجعل لنا من فضله بابًا، ومن قوته سندًا، ومن رحمته مخرجًا.

يا رب ما تحوجناش لحد، ولو احتجنا، ارزقنا الشخص اللي ما يكسرناش وإحنا بنطلب منه.

وارزقنا كفاية تغنينا، وكرامة تحمينا، وقلبًا ما يتعلقش إلا بيك.

ربنا ما يحوجنا لحد… ويغنينا بفضله عن كل حد.