كتب لكم المقااال 👇
بقلم ✍️احمد حمدى مستشار علاقات دبلوماسية المجلس العربى الإفريقي الدولى ورئيس اللحنة العليا لتنظيم الاعلام
الطفل اللي بيتم التعدي عليه أكتر من مره في مدرسه وولي أمره ميعرفش غير بعد شهور والطفل اللي جاره بيستدرجه من الشارع والأب والام نايمين علي ودانهم وغيرها من الحالات دا ميدينيش الحق اني احاسبكم زيكم زي الجاني في قفص واحد ؟؟
لما يكون أب كل همه جمع المال وأم كل همها العمل وتحقيق الطموح الشخصي والاستقلاليه وراميين ولادكم للحضانات والشوارع والنوادي وبيوت تيته وجدو ومتعرفوش عنهم حاجه غير مواعيد الدروس والتمرينات من جروبات الماميز والمدربين والمدرسين يبقي بتسمعوهم امتي وتتكلموا معاهم امتي وتعرفوا احوالهم ومشاكلهم امتي وتحضنوهم امتي ؟؟
متقوليش ضغوط الحياه والمعيشه بتجبرنا علي دا . كتير من الحالات حصلت في مدارس راقيه ومناطق سكنيه ومستويات اجتماعيه مرفهه بتدل ان الاب والأم مش مضطرين ولا هيموتوا من الجوع لو اهتموا اكتر بولادهم علي حساب جمع المال . لكن للأسف الطمع والأنانيه وعدم الاستعداد لتحمل المسؤليه بيخليكم تفضلوا نفسكم ومصالحكم علي حساب ولادكم . ودا ميمنعش ان في حالات استثنائيه الفقر والحاجه بتجبرهم علي العمل والسعي لتوفير أهم الضرورات لأطفالهم ، لكن للمفارقه العجيبه الراجل او الست المضطرين لظروفهم هم اكتر ناس بتهتم لأطفالها ..
اطفالكم أمانه وأقبح البشر خاين الأمانه وخصوصاً لو كانت الأمانه كائن ضعيف لا حول له ولا قوه . لو مش قد مسئولية تربية طفل متتجوزوش . لو مش جاهزين تحطوا أطفالكم في الأولويه والمرتبه الأولي متخلفوش . الطفل ملوش ذنب انه يتحمل طول حياته نتيجة وجوده في بيت أب أناني أو أم أنانيه كل همهم مصلحتهم وبس وميعرفوش ترتيب الأولويات .
النوادي والمدارس والحضانات الشيك وغرف الألعاب المكدسه في البيوت والاقامه مع تيته وجدو مش هيعوضوا أطفالكم عنكم . التربيه مش فلوس ودروس ورفاهيات . التربيه رعايه واهتمام وسؤال وسماع وحضن يساع ..
ليست هناك تعليقات:
إرسال تعليق