حدوتة انهاردة عن البيه المسئول و البنت الجميله اللي كل ذنبها :
📌📌كيس فول ورغيفين عيش..
طالبة في الصف الأول الثانوي، من قرية نزلة المشارقة بمركز إهناسيا، بتبدأ يومها بـ30 جنيه بس من والدها الموظف البسيط 15 جنيه منهم بيروحوا في المواصلات رايح جاي، والـ15 التانيين تحاول تعيش بيهم يوم طويل بين يوم دراسي في المدرسة ودروس بعده لحد المغرب
بتشتري رغيفين عيش وكيس فول وجبة تسندها وتكفيها لآخر اليوم.
يوم الخميس، الأستاذ محمود الفولي، وكيل وزارة التربية والتعليم ببني سويف، دخل الفصل في زيارة مفاجئة
الطالبات واقفين في هدوء، حالة ترقب وخوف طبيعي من أي زيارة رسمية، لحد ما عينه جت على درج الطالبة ولاحظ كيس الفول ورغيفين العيش.
بدل ما يعدي الموقف طلب من مديرة المدرسة تفتح الدرج وتطلع الأكل قدام الكل..
و هنا بدأ المشهد ياخد منحنى محرج جدا مع تعليقات فيها سخرية واضحة: «إيه الفول دا؟ حد بياكل فول في الفصل؟» وكمل بنبرة تهكم: «طب هتاكليه إزاي ده؟ أكيد هتقعدي تغمسي في الفسحة! »، وسط نظرات الطلبة وضحكات مكتومة زودت الإحراج للبنت.
الموقف ما وقفش عند كدا لكنه تصاعد بشكل أكبر لما وجه تعليماته بتحريز «كيس الفول والرغيفين». آه حضرتك قرأتها صح «تحريز» زي المخدرات كده، وكمان طلب تحرير مذكرة بالواقعة، وكأننا قدام مخالفة جسيمة مش مجرد أكلة بسيطة لطالبة ظروفها صعبة، ثم وجه كلام حاد للأخصائي الاجتماعي قدام الجميع، وقاله «أنت متحول للتحقيق يا أستاذ» .
في اللحظة دي، الفصل كله ساكت، والأنظار كلها على البنت، هي ماقدرتش تدافع عن نفسها ولا تقول كلمة، كل اللي عملته إنها وطت راسها على الدرج، ودموعها نزلت في صمت، بتحاول تختفي من الموقف اللي كان أكبر منها بكتير، لحظة واحدة، لكن كانت كفيلة تكسر خاطرها قدام زميلاتها، وتسيب أثر صعب يتمحي بسهولة.
طبعا، البنت رجعت البيت منهارة وبتعيط، ورافضة ترجع المدرسة تاني
بجد إزاي مسؤول بالمنصب ده يتصرف بالطريقة دي!
وهل يرضي سيادة المحافظ ووزير التربية والتعليم إن طالبة تتعرض للإهانة دي؟ إحنا محتاجين تحقيق عاجل في الواقعة
و حق كسر خاطر البنت أمام الجميع لازم يرجع. بقلم..عاشقة الوطن سحر غانم
ليست هناك تعليقات:
إرسال تعليق