بقلمى ✍️ احمد حمدى مستشار علاقات دبلوماسية
بعد الخلع ما بيتعاملش مع الموضوع كأنه انفصال طبيعي هو بيشوفه هزيمة وجرح كبير لصورته وكبريائه وخصوصاً إن الخلع معناه إنك إنتي اللي قررتي تمشي وتتنازلي عن كل حقوقك عشان بس تخرجي من العلاقة
★ وده بيخليه بيعمل ردود فعل مختلفة منها:
1️⃣ حيشوه سمعتك
♦️ حيلف على أهلك، أهله، الشغل.... (حيقول عليكي قليلة الأصل،اتغيرتي،شيفالك شوفه،ناشز،خاينة مش بتتحملي المسؤولية،قاسية ،ناكرة للجميل....... )رغم إنك وصلتي للخلع هروب من الاذى مش كره فيه بس
2️⃣ لعب دور الضحية
♦️ شوفوا عملت فيا إيه😭ظلمتني وحرمت الولاد من أبوهم خانت العشرة وخربت البيت
حيبدأ يألف قصص ويسمعها للكل وحيقعد يحكي بثقة وكأنه ملاك اتأذى من غير اي سبب
★ حيبكي للناس وحيحكي وجعه مع إن نفس الشخص ده ممكن يكون بيضرب مراته وبيهينها وبيخونها وبيستنزفها نفسياً سنين كاملة
★ وممكن تكون عاشت معاه وهي طول الوقت ( خايفه تتكلم وخايفه تزعل او تخاف حتى تعبر عن وجعها ) لكن أول ما تمشي أو ترفع خلع فجأة بينسى كل اللي عمله فيها ويبدأ يمثل دور الراجل المكسور والمظلوم
★ النرجسي ما بيحكيش الحقيقة كاملة أبداً بيحكي الجزء اللي بيخليه ضحية ويخليكي إنتي🫵الجلاد
3️⃣ حيحاول يستفزك بأي طريقة
♦️ زي مثلا ينشر كلام عن الخذلان وقلة الاصل عشان يستزفك وتتعصبي وتردي
★ حيستخدم الولاد ورقة ضغط عليكي يعني لو بيقابلوه حيتكلم عليكي قدامهم بطريقه وحشه ويقولهم بلغوا ماما بكذا.......ماما اللي هدت البيت وبعدتنا عن بعض........) او حيقلب الولاد عليكي ويظهرك قاسية أو انانية عشان يكسبهم ضدك لان الولاد بالنسباله ورقة ضغط مش أرواح
★ او فجأة يبقى حنين معاهم ويقولهم قولوا لمامتكم انها وحشتني........
ده مش ندم ده اختبار بيشوف هل لسه مسيطر عليكي ويقدر يرجعك ولا لأ؟
4️⃣ حيراقبك من بعيد
♦️ يسأل عنك او يراقبك على مواقع التواصل و حيضايق جداً لو عرف إنك هديتي أو بقيتي أحسن من بعده
5️⃣ حيدخل في علاقات بسرعه
♦️ عشان يثبت لنفسه وللناس إنه مرغوب فيه وإنه عادي ومش متأثر باللي عملتيه
6️⃣ مرحلة الرجوع المتأخر
( أنا اتغيرت عشانك, انا حعمل كل اللي انتي عيزاه.......)
★ بعد فترة لما يلاقيكي بدأتي تهدي وتكملي حياتك عادي بيظهر بكلام ناعم ووعود كتير لانه خايف انه يخسرك للابد او إنك تكوني أحسن من غيره وخصوصاً لو مفيش بديل في حياته
7️⃣ الصمت العقابي لو فشل
♦️ لو لقى إنك مش راجعة ومش بتتأثري بكلامه وبمحاولاته بيختفي وبيقطع التواصل وبيقطع المصاريف وبيقطع الرؤية عشان يعاقبك إنك خرجتي من سيطرته ويعاقب الولاد إنهم بقوا معاكي
🛑 النرجسي بعد الخلع ما بيتوجعش بس لأن العلاقة انتهت هو بيتوجع لأنك إنتي اللي قررتي تمشي ولأن صورته اتكسرت قدام نفسه قبل الناس
لأنه كان متخيل إنك مهما تعبتي حتفضلي موجودة
ومهما أذاكي حتسكتي وتستحملي
🛑 فلما تخلعيه بيحس إن السيطرة راحت من إيده وده أكتر شيء بيهزه من جواه عشان كده تلاقيه بعد الخلع بيشوه سمعتك وبيقلب الناس عليكي او يحكي قصص ناقصة أو كدب ويمثل إنه الضحية المظلوم مش لأنه بريء فعلاً لكن لأنه خايف الناس تعرف الحقيقة إن واحدة عاشرته ووصلت لمرحلة إنها تتنازل عن كل حاجه عشان بس تنجي نفسها منه
🛑 ولو الناس صدقته بيحس بالانتصار مش لأنه مظلوم فعلاً لكن لأنه عرف يحافظ على صورته قدامهم
🛑 وحيحاول يكسب تعاطف الكل لأنه خايف جداً ان حقيقته تتكشف عن طريقك فبيسبقك عشان يشوه سمعتك والناس تصدقه وميلحقوش يسمعوا منك ويصدقوكي.......
نصيحة أخيرة🌹:
★ ما تدخليش في معركة إثبات حقيقتك لشخص اختار يشوهك لأنك كل ما حاولتي تشرحي أكتر كل ما بتدخلي نفسك في دايرة استنزاف هو عايز يدخلك فيها تاني
★ خلي تركيزك على هدوءك وحدودك وتعافيكي وحياتك إنتي والولاد لأن ده اللي بيكشف أي صورة مزيفة من غير ما تتكلمي
★ ومهما حصل ردود الفعل مش هي اللي حتثبت مين الصح ومين الغلط لأن الزمن وهدوءك هما اللي بيكشفوا الحقيقة في النهاية.
النرجسيه مرض العصر
ليست هناك تعليقات:
إرسال تعليق