بقلم دكتوره/منال عبدالشافى
المقاله الثانية من “كنوز الرحلة”
كنز… إطعام الطعام
والنهاردة هنفتح باب من أبواب الرحمة…
باب مش محتاج مال… ولا استعداد…
باب يقدر يفتحه أي إنسان… مهما كان حاله.الرحلة دي مش على الأرض…
الرحلة دي جوّه القلوب…
والقلوب مهما تعبت
بتفوق لما تدوق معنى العطاء.
والنهاردة كنزنا…
إطعام الطعام.
طعامك… عبادة”
النبي ﷺ قال:
"يا أيها الناس أفشوا السلام، وأطعموا الطعام، وصِلوا الأرحام، وصلّوا بالليل والناس نيام… تدخلوا الجنة بسلام."
الجمال مش بس في الوصية…
الجمال في العموم.
ماحدّدش فقير… ولا غني…
ولا جعان… ولا شبعان…
ولا قريب… ولا غريب…
قال: “أطعموا الطعام” وبس.
كأنه بيقول:
خلّوا الخير و الرحمة تنتشر…
خلّوا الإطعام تبقى لغة حبّ بينكم.
لأن الطعام يُشبع الجسد…
لكن الإطعام يشبع الروح.
ليه الإطعام بيهزّ الروح وبيعالج النفس؟
علم النفس بيقول
إن مشاركة الطعام بتنشّط مراكز الأمان العاطفي في المخ.
لما تمدّي إيدك بلقمة…
اللي قدامك يحس إنه مش لوحده…
فيحصل توازن في الجهاز العصبي،
ويقلّ هرمون التوتر،
ويزيد الأوكسيتوسين — هرمون المودة والطمأنينة.
يعني…
اللقمة الصغيرة
تعمل جوّا الإنسان حالة اسمها:
احتضان غير مرئي.
والأجمل؟
إن الشخص اللي بيطعم غيره…
بيتعالج هو كمان.
العطاء مش بس بيلمس اللي قدامك…
العطاء بيرجع يمدّ روحك بالمحبة…
يزوّد إحساسك بالمعنى…
ويخلق صوت داخلي يقول:
لسه الدنيا بخير… ولسه قلبي قادر يحب.
وده اللي العلماء بيسمّوه:
Warm Glow
دفء داخلي يروّض القلق.
لما الإنسان يدي…
النفس تستعيد توازنها الطبيعي.
كأن العطاء
بيصحّح الاهتزاز الداخلي اللي بيعمله القلق…
وبيهدّي الضوضاء النفسية اللي بتعملها الهموم.
العلماء بيسمّوه كمان:
Regulation by Giving
تنظيم نفسي بالعطاء.
ولما فحصوا المخ بعد فعل الإحسان لقوا إن: مراكز التوتر بتهدى
نبض القلب بينتظم
التنفس بيبقى أعمق
الذهن بيبقى أصفى
كأن الروح
رجعت مكانها…
رجعت تتوازن…
وفي العلاج النفسي بنقول:
الإنسان اللي بيدي…
بيطلع من سجن “أنا”
ويدخل مساحة “نحن”.
وكتير من القلق سببه
إننا محبوسين جوّه نفسنا زيادة عن اللزوم.
العطاء عموماً — وخاصة الإطعام —
بيغسل القلب من ثِقل الذات…
ويبعد النفس عن الأنانية…
ويرجّعها للصفاء والفطرة
اللي ربنا خلقها عليها.
عشان كده بعد الإطعام
في راحة… وطمأنينة… وسلام…
وإحساس إن كل شيء بأمر الله.
وده معناه
إن الإطعام مش بس تنفيس عن غيرك…
ده تنفيس عنك إنتِ.
وعشان نفهم المعنى ده مش بالكلام…
خلّونا نسمعه من فعل حقيقي…
قصة حصلت في بيت
اتربّى على العطاء…
بيت كان الإطعام فيه عبادة…
والنية خالصة لوجه الله.
من بيت سيدنا عليّ بن أبي طالب
وستنا فاطمة رضي الله عنهما…
كانوا صايمين…
وعندهم شوية شعير على قد الفطار …
ستنا فاطمة خبزت خمسة أقراص
وحطوهم بين ايديهم يفطروا
وأول ما المغرب… اذن
خبط على الباب مسكين وقال:
يا أهل بيت محمد… أطعموني أطعمكم الله. من غير تردّد…
سابوا الأكل… وادّوه كله…
وفطروا على ميّه.
تاني يوم… يتيم.
تالت يوم… أسير.
تلات أيام صيام وجوع وعطاء…
ولا شكوى…ولا انتظار شكر.
فنزل قول الله تعالى:
﴿وَيُطْعِمُونَ الطَّعَامَ عَلَىٰ حُبِّهِ مِسْكِينًا وَيَتِيمًا وَأَسِيرًا إِنَّمَا نُطْعِمُكُمْ لِوَجْهِ اللَّهِ
لَا نُرِيدُ مِنكُمْ جَزَاءً وَلَا شُكُورًا﴾
القصة دي مش تاريخ…
دي رسالة لقلوبنا النهارده.
إن اللقمة اللي بتطلع من إيدك بصدق…
ممكن تكون سبب في نزول رحمة…
وفي شفاء.ما كانش ليه علاج غير العطاء.
ومن هنا نفهم إن الإطعام:
مش بس بيشبع جسد غيرك…ده كمان
بيرجّع التوازن لروحك،
وبيهدّي النفس لما تتلخبط.
تطعمي حد…ربنا يطعم قلبك سكينة.
تطعمي ضعيف…يرفعك القوي.
تطعم محتاج…يسقط عنك كرب.
اللُقمة صغيرة أو كبيرة…
الميزان عند ربنا هو النية.
وما ننساش كائنات ربنا.اللي ما بتطلبش…
العصافير… الطيور… الحيوانات.
قال ﷺ:
"في كل كبدٍ رطبةٍ أجر."
إنتِ مش بس بتطعم عصفور…
إنتِ بتعلّم قلبك الرحمة.
نفسيًا…
الرحمة من غير مقابل بتكسر القسوة…وتوسّع القلب…وتقلّل القلق…
واللي بيرحم الضعيف الصامت ربنا يرحمه
وقت ما هو مش قادر يتكلم.
خُد كنز الحلقة
1️⃣ اطعمي أي حد… مش شرط فقير.
جارة… صديقة… موظف… طفل…
الإطعام في ذاته عبادة.
2️⃣ خلّي الإطعام عادة يومية.
وجبة… فاكهة… بسكويت… أي حلويات.
الإطعام يبني جسور إنسانية بلا حدود.
3️⃣ إطعام العصافير والطيور.
شوية رز على الشباك…
طبق ميّه في الحر…
فتافيت عيش على الرصيف.
رحمة صامتة لا تنتظر شكر…
لكنها تفتح أبواب سكينة كبيرة.
يا أصحاب الرحلة…إطعام الطعام
مش مجرد عمل خير.ده باب رحمة…
باب سعادة…باب أمان…باب جنة.
ولو حد سامعني وحاسس بالتيه…
جرّب تطلع لقمة… حتى صغيرة…
يمكن تكون المفتاح
اللي يفتح باب فرجك…ويسند روحك…
ويرفع عنك حمل تقيل.
استنونافي المقاله الجاية
من كنوز الرحلة…
ومع كنز جديد
ليست هناك تعليقات:
إرسال تعليق