ليه بنمنع نفسنا من التعبير عن حبنا

ليه بنمنع نفسنا من التعبير عن حبنا بكلمات يمكن تكون بسيطة لكن مهمة وتقدر تغير حاجات كثير في حياتنا..

وقوفك في المطبخ ونظافة بيتك والإهتمام بولادك وأكلهم ونظام حياتهم حب، لكن فين الصعوبة لو أخذتيهم في حضنك رغم تعبك في رعايتهم وقولتي لهم أنك بتحبيهم كلمة لكن تأثرها قوي، ليه صعب لما زوجك يرجع البيت بعد يوم طويل أنك تقربي منه حتى لو شارد وترمي برأسك على كتفه وتدلكي ذراعه وتقولي له أن وجوده في حياتك أهم من الدنيا كلها، وأنك بتحبيه ووجوده معاكي نعمة بتشكري ربنا عليها، ليه بتكتمي ده جواكي رغم أن دي الحقيقة..

شغلك وتعبك وسهرك في الشغل وحمل مسئولية البيت وتفكيرك في مستقبل ولادك مهم ودليل على حبك، لكن مش صعب أبداً أنك رغم يوم طويل أنك تأخذ ولادك في حضنك وتحسيسهم بوجودك ووسط لعبة بسيطة يمكن لدقائق تعبر فيها عن حبك بكلمات بسيطة، ليه صعب أنك وسط مشاغلك ترن على زوجتك وتقولها أنك شايفها قصادك طول الوقت وأنك بتحبها، أو لما ترجع تبوس أيديها وتقولها أن أحلى أكل هو أكلها لأنه من أيدها وده بس عشان بتحبها، او ان ترمي رأسك على كتفها وتقول لها أن هموم الدنيا بتختفي بس وهي معاك..

بلاش تستكتروا كلمة حب لأن في بيوت بتتهد بسبب السكوت اللي بيتحول لجفاء وهجر، عودوا بعض على الكلام الحلو اللي يثلج القلب وينور في وسط العتمة منارة تنور أيامكم..

كلمة بحبك مش مجرد كلمة لأن تأثيرها قوي في استمرار الحياة..

                                                بقلم عاشقة الوطن..سحر غانم