بقلم 🖍احمد حمدى مستشار علاقات دبلوماسية المجلس الافريقى للاتحاد الدولى ورئيس اللجنة العليا المجلس الاعلى لتنظيم الاعلام
«هو أنت متغير معايا؟ أنا عملت حاجة ضايقتك؟ ولا أنت خلاص مبقتش طايقني؟»
عمرك فكرت إنك ممكن تكون بتتعب نفسك بسبب حاجة أنت متخيلها، مش بالضرورة تكون حصلت فعلًا؟!
في علم النفس المعرفي، فيه تشوه معرفي اسمه قراءة الأفكار (Mind Reading).
وده ببساطة إنك تفترض إنك عارف الشخص اللي قدامك بيفكر في إيه، أو حاسس بإيه ناحيتك، من غير ما يكون عندك دليل حقيقي.
زي مثلًا:
- مردش على رسالتي؟ أكيد بيتجاهلني.
- اتكلم معايا بطريقة مختصرة؟ شكله زهق مني.
- مش مبتسم النهارده؟ أكيد زعلان مني.
- انتقد تصرف عملته؟ أكيد شايفني فاشل.
المشكلة إننا ساعات بنحوّل مجرد احتمال في دماغنا لحقيقة مؤكدة، ونبدأ نتعامل مع الناس على أساس الحقيقة اللي إحنا اخترعناها!
ومن منظور العلاج المعرفي السلوكي (CBT)، النوع ده من التفكير ممكن يزود القلق، ويخلق مشاعر الرفض والحزن، ويسبب مشكلات في علاقاتنا بالآخرين.
طيب نعمل إيه؟
قبل ما تصدق الفكرة، اسأل نفسك:
- إيه الدليل إن الشخص فعلًا بيفكر كده؟
- هل فيه تفسير تاني للموقف؟
- أنا متأكد من اللي بفكر فيه، ولا مجرد بفترض؟
افتكر إنك مش مطالب تعرف كل اللي بيدور في عقول الناس، ومش كل تصرف منهم لازم يكون له علاقة بيك.
أحيانًا إحنا مش بنتألم من تصرفات الآخرين، أد ما بنتألم من التفسيرات اللي بنحطها للتصرفات دي.
مش كل فكرة بتيجي في بالك حقيقة... حتى لو حسيتها حقيقية جدًا.
ليست هناك تعليقات:
إرسال تعليق