شخص ما قال لي إن الأشخاص في حياة بعض عبارة عن غلطات وكل شخص غلطة حسب مدة معرفته بيه او قوة علاقته وتعامله معاه، وكان في رأيه أن البعد و الاستقلال بالنفس راحة ومكسب أبدي .
بس من وجهة نظري إن وجود الأشخاص في حياتنا نعمة، وإلا مكانش ربنا خلقنا قبائل وعائلات .. عمر ما كان الأب والأم اللي واقفين في ضهرنا العمر كلة غلطة .. عمر ما الصديق اللي بيكون داعم حقيقي واللي بيخلينا نقوم ونكمل جري وقت الإنهيار غلطة .. عمر ما الشخص اللي بيفضي نفسة علشان يسمعنا ويدينا حلول لمشاكلنا غلطة.
أه في ناس مؤذية .. وفي ناس بتدينا دروس قاسية ولكن وجودهم هو اللي بيعلمنا إزاي نتعامل ونتعايش في الدنيا، فـ الشخص اللي يدخل حياتنا و يقلب ألوانها لأبيض وأسود بدون روح ولا بهجة، دة اللي بيتقال وجودة غلطة .
والحقيقة إن الغلطة مش فيه ولا حتى في وجوده .. الغلطة في إختيارتنا .. لأن إحنا اللي بنحدد مين اللي وجوده مناسب في حياتنا ومين لأ، لكن أكبر غلط إن نعمم الغلطة على كل الناس .. علشان زي ما في وجود غلط .. كمان في أشخاص وجودها مكسب حقيقي وميتعوضش .
العلاقات حلوة .. و بتدينا سبب علشان نكمل الحياة .. بس المهم نعرف نختار كويس..وقبل ما نقول كلنا غلطات في حياة بعض .. نشوف إتعلمنا إيه من اللي دخلوا حياتنا ونفتكر ذكرايتنا الجميلة ونضحك عليها .
ليست هناك تعليقات:
إرسال تعليق