رسالة لكل اللي بيدعموني، لكل اللي موافق على كلامي، لكل راجل وست اتظلموا من قوانين الأسرة.. *اسمعوني كويس.*
إحنا مش عايزين تعليق وخلاص. مش عايزين لايك وشير وننام. *عايزين نقف كلنا إيد واحدة عشان نغير القوانين دي.* لازم صوتنا يوصل، لازم صوتنا يتسمع، غصب عن أي حد.
*وأنا بوجه كلامي دلوقتي للستات "القوية قوي" دي.. الظالمة قوي دي:*
1. *يا اللي بتحرمي أب من عياله* وبتتعنتي في الرؤية.. *هتروحي من ربنا فين؟!* فاكرة إنك كسبتي لما كسرتي أب قدام ابنه؟!
2. *يا اللي مصممة توصلي أبو ولادك للسجن* رغم إنك واخدة كل حاجة.. نفقات، شقة، عفش.. ولسه عايزة تدمري مستقبله! *عايزة منه إيه تاني؟! عايزة تشوفيه ميت؟!*
3. *يا اللي بتكدبي وتفتري وتجيبي شهود زور* عشان تاخدي حاجة مش من حقك وخدتيها قبل كده ألف مرة.. *ضميرك فين؟ هتقابلي ربنا تقولي له إيه؟!*
*وأنا مش جاية على حق الست.* بالعكس، فيه ستات كتير مظلومة وكويسة. بس إحنا بنتكلم على *الأغلبية اللي شايفينها بعنينا في المحاكم كل يوم.* بنتكلم على الظاهرة اللي خربت البيوت.
*فـ بقولها بالفم المليان: بلاش قهر للرجالة.. لإن القهر هيولد الانفجار.*
ووقتها هنوصل لمرحلة مش هنعرف نلمها بعد كده. بجد مش هنعرف نوصل للسلام تاني. هتخسروا كلكم.
*فياريت كلنا نرجع لربنا.* نفكر إن كل ظلم له نهاية، وإن *{كَمَا تَدِينُ تُدَان}*.
ويا ستي حتى لو مظلومة.. *اعملي لله.* اعملي الخير وارميه البحر. ماتحاربيش في عيالك، ماتحاربيش في أبو ولادك.
*القوانين دي لازم تتغير.. دلوقتي حالاً.*
قبل ما البلد كلها تنفجر. قبل ما نلاقي جيل كامل طالع كاره أبوه وأمه وكاره الجواز وكاره البلد.
*صبري نفد.. وصبر الناس نفد.*
يا تغيروها بالذوق، يا هتتغير بالعافية لما الدنيا تولع.
#تعديلات_قانون_الاحوال_الشخصية_فوراً
#كفاية_قهر
#الانفجار_قادم. بقلم المستشارة...ايمان رجب
ليست هناك تعليقات:
إرسال تعليق