لما تكوني الاختيار المؤقت
لما تحسي انك الاختيار المؤقت،
مش علشان وجودك قليل القيمة،
لكن علشان حد شافك محطة مش بيت،
وقف على باب قلبك لما احتاج، ومشي لما طمن نفسه.
الوجع هنا مش بس انك اتحبيتي،
الوجع انك اتحطيتي على الرف،
وان كل حبك واستثمارك اتقسم نصين: نص ليه، ونص لوجعك.
لما حد:
يقرب لما يحتاج، ويبعد لما يحس بالأمان.
يخليكي مطمئنة بالكلام، وبعدها يسيبك واقفة على اسئلة بلا اجابات.
يبني لك مستقبل محتمل بالكلام، لكن أفعاله مش موجودة.
ويفضل يقول:
مقصدتش أذيكي
كنت محتاج وقت
ما كنتش عايز أذي
وانتي واقفة قدام وجع صامت
يسحب الهواء من قلبك،
ويسيبك تحسي انك موجودة بس علشان يملأ فراغه.
اعملي الخطوات دي عشان تستردي نفسك من تاني
١- اعترفي بالوجع من غير جلد. قولي بصوتك أو جواكي :
انا اتحطيت على الرف، وده وجع حقيقي.
٢-اكتبي المواقف مش الشخص. لحظات حسستك انك مؤقتة، من غير تبرير ولا دفاع.
٣-فرقي بين الحب والاحتياج.
٤-واجهي الحقيقة المؤلمة: لو فضلتي في مكان الاختيار المؤقت، هتتعبي، وهتضيعي من نفسك.
٥-رسالة ما تتبعتش. اكتبي كل اللي نفسك تقوليه :ليه أنا اختيار مؤقت؟ بعد ما تخلصي، اقفلي الورقة، الرسالة دي ليكي مش ليه.
٦-حطي ايدك على قلبك وخدي نفس عميق وقولي:
انا مش محطة، انا بيت للي يستاهل.
اللي يخليكي تحسي انك مؤقتة
ما يستاهلش قلبك.
وانتي مش محطة مؤقتة لأي حد،
انتي استحقاق كامل.... بقلم عاشقة الوطن..سحر غانم
ليست هناك تعليقات:
إرسال تعليق