أصعب درس اتعلمته من الحياة... إن الأذى مش دايمًا بييجي من الغرباء.

كتب المقااال

 بقلم✍️احمدحمدى

مستشارعلاقات دبلوماسية المجلس الافريقى الدولى ورئيس اللجنةالعليا للصحافة والاعلام 

طول عمري كنت بحب الناس، وعمري ما بصيت لحد بشكل وحش، لا شكلًا ولا موضوعًا. كان عندي إيمان دايمًا إن إحنا بشر، مش كاملين، وكل واحد فينا جواه جانب كويس وجانب محتاج يتصلح.

كنت مؤمن إننا مش بنتولد وحشين، إحنا بنتولد صفحة بيضا، والحياة والتجارب والاختيارات هي اللي بتلون صفحاتنا.

وكنت دايمًا بقول إن الإنسان مهما غلط، يقدر يرجع، ويعتذر، ويحس بالذنب، ويحاول يصلح اللي كسره، لأن دي طبيعة البشر اللي كنت مؤمن بيها.

ما تخيلتش يوم إن فيه إنسان ممكن يكون مؤذي لدرجة إنه يوجع حتى الناس اللي حبته بصدق، واللي ما شافتش منه غير الخير.

ما تخيلتش إن الوجع ممكن ييجي من إنسان اديته كل الحب، وشوفته رفيق روح، وابن، وسند، وإنسان كنت شايفة جزءًا من حياتك، مش مجرد شخص عابر فيها.

ما كنتش أعرف إن بعض الدروس مش بتيجي من الغرباء، وإن أقسى الخبطات ممكن تيجي من أقرب الناس لقلوبنا.

وإن أحيانًا ربنا بيكشف لنا حقيقة البشر مش بكلامهم، لكن بالمواقف اللي بننكسر فيها على إيديهم.

يمكن أصعب حاجة مش إنك تكتشف إن فيه ناس مؤذية، لكن إنك تكتشف إن الإنسان اللي كنت مستبعد منه الأذى تمامًا هو نفسه اللي هيعلمك أقسى درس في حياتك.

مش كل اللي بنحبهم بيشبهوا قلوبنا، ومش كل اللي بنمنحهم الأمان يعرفوا يحافظوا عليه.

وأحيانًا أكبر درس في الحياة إنك تتعلم تحافظ على نقاء قلبك، لكن ما تسيبش نقاء قلبك يمنعك من رؤية حقيقة الآخرين.