سلامك النفسي مش رفاهية.. دي معركة لازم تكسبها

بقلم/امل صالح سليم

في زمن بقى فيه التدخل في حياة الآخرين عادة والكذب وسيلة للمصلحة والنفاق قناع اجتماعي والغيرة أحيانا بتتحول إلى أذى متعمد أصبح الحفاظ على السلام الداخلي ضرورة مش مجرد رفاهية

مش كل باب لازم نفتحه لكل عابر ومش كل شخص يستحق يكون له مكان في حياتنا ومش كل معركة تستحق إننا نخوضها

في ناس بتيجي حياتنا محملة بالمشاكل وفي ناس بتعيش على نقل الكلام وإشعال الخلافات وفي ناس لا تعرف تفرح لغيرها وفي ناس بتحاول تفرض وجودها بالتدخل والسيطرة والتقليل من الآخرين

وهنا لازم الإنسان يتعلم فن وضع الحدود

إنك تقفل الباب في وش النفاق والكذب والحسد والدراما والطاقة السلبية مش معناه إنك شخص متكبر أو قاسي لكنه معناه إنك وصلت لمرحلة فهمت فيها إن راحتك النفسية أغلى من إرضاء الجميع

لكن السلام الداخلي مش معناه إننا نهرب من النقد أو نرفض الاختلاف أو نعيش في عزلة عن الناس بل معناه إننا نعرف نفرق بين شخص بيواجهنا بالحقيقة وشخص بيتعمد يكسرنا وبين نصيحة هدفها مصلحتنا وتدخل هدفه السيطرة على حياتنا

المشكلة إن البعض بيستهلك عمره في تبرير تصرفاته والدفاع عن نفسه أمام أشخاص لا يبحثون عن الحقيقة أصلا بل يبحثون عن فرصة جديدة لاستنزافه

والأخطر إن الإنسان أحيانا بيكون هو اللي بيسمح للآخرين باقتحام مساحته الخاصة خوفا من الزعل أو الوحدة أو كلام الناس

الحقيقة إن مش كل خسارة خسارة ومش كل ابتعاد قسوة وأحيانا يكون الانسحاب من علاقة مؤذية هو أول خطوة حقيقية نحو استعادة نفسك

احترم نفسك بما يكفي لتعرف من يستحق الدخول إلى حياتك ومن يجب أن يبقى خارجها

فالحياة أقصر من إنك تقضيها في معارك لا تخصك وراحة بالك أثمن من إنك تضحي بيها لإرضاء أشخاص لا يعرفون قيمة وجودك

اقفل الباب أمام الأذى وافتحه أمام الحياة

لأن سلامك الداخلي يبدأ من اللحظة اللي تقرر فيها إنك مش هتسمح لأي إنسان يكون سببا في سرقة طمأنينتك.

مش مطلوب منك تكسب كل الناس المطلوب إنك ما تخسرش نفسك وأنت بتحاول ترضيهم