تعالوا أقولكوا… مش كل ست واثقة في نفسها تبقى ديفا، ومش كل ست بتلفت النظر تبقى ديفا!
المرأة الديفا حكاية تانية خالص…
هي الست اللي دخلت معركة طويلة مع نفسها، واتعلمت فيها تحب نفسها من غير ما تستنى تصفيق من حد.
الديفا مش معناها ست متكبرة، ولا واحدة شايفة نفسها فوق الناس… بالعكس، ممكن تكون أهدى واحدة في المكان، وأقلهم كلامًا، لكن حضورها لوحده يقول: "أنا عارفة أنا مين."
هي مش بتجري ورا الراجل عشان يثبت لها إنها حلوة، ولا بتستنى صاحبتها تقولها إنها ناجحة، ولا بتقيس قيمتها بعدد الناس اللي بيحبّوها.
هي قيمتها ثابتة… سواء اتقال لها كلام حلو أو اتقال عليها كلام وحش.
المرأة الديفا لما تحب… تحب بجد،
ولما تدي… تدي من قلبها،
لكن لما تكتشف إن وجودها في مكان بيقلل منها، بتعرف تمشي.
مش بتفضل واقفة على باب حد تستنى اهتمامه، ولا بتقضي عمرها تسأل:
"هو ليه اتغير؟ هو ليه بعد؟ هو ليه مبقاش زي الأول؟"
لأنها وصلت لمرحلة فهمت فيها إن اللي عايزك هيعرف يحافظ عليك، واللي مش مقدّرك مش محتاج منك محاضرة عشان يفهم قيمتك.
الديفا كمان مش بتنافس الستات…
مش بتبص لواحدة أجمل منها وتكرهها، ولا لواحدة أنجح منها وتحاول تكسرها.
بالعكس… بتقول:
"ما شاء الله… ربنا يزيدها، وأنا كمان هشتغل على نفسي."
لأنها فاهمة إن رزق غيرها مش بياخد من رزقها، وإن نجاح واحدة مش معناه فشلها.
والأجمل بقى؟
إن المرأة الديفا مش لازم تكون كاملة…
هي عندها عيوب، وبتغلط، وبتعيط، وبتتعب، وممكن تقع…
لكن الفرق إنها مش بتفضل على الأرض.
بتقوم، تصلح، تتعلم، وتكمل.
عشان كده…
الديفا الحقيقية مش هي الست اللي كل الناس بتبص لها…
الديفا هي الست اللي لما تبص لنفسها في المراية، تكون راضية عن المرأة اللي بقت عليها. 👑❤️
فلو إنتِ ست عارفة قيمتك، بتحترمي نفسك، مش بتسمحي لحد يهينك، وبتعرفي إمتى تدي وإمتى تنسحبي…
مبروك… إنتِ مش مغرورة.
إنتِ ببساطة… ديفا. 👑
بقلم: دكتورة إسلام محمد
استشارية نفسية وعلاقات أسرية ودكتوراه في التنمية البشرية وتطوير الذات
وعضوة بمنظمة حقوق الإنسان وصاحبة كتابي "البحث عن الذات" وكتاب"طوظ"
ليست هناك تعليقات:
إرسال تعليق