الخليج يهاجم مصر .. ساعدناكم بالمليارات .. ووقت الجد مالقيناش مصر!”
الرأي العام في الخليج بيهاجم مصر جامد جدًا، وبعض حكوماتهم ماشية في نفس الاتجاه
بس السؤال المهم: هو الخليج كان مستني من مصر تحارب إيران علشان مصلحة أمريكا وإسرائيل؟
إيران ما ضربتش مصالح خليجية ولا قصفت مواقع جوه دول الخليج، والدليل بسيط: فين الضحايا من شعوب الخليج؟
التركيز كله كان على القواعد الأمريكية، اللي أصلًا شوكة في ضهر الأمة العربية والإسلامية، ومنها اتضرب العراق وسوريا واليمن وإيران وأفغانستان
والكل فاهم إن القواعد دي موجودة علشان تحمي إسرائيل مش الخليج، وكمان متخيلين إن لما بيرصدوا هدف بيبلغوا إسرائيل الأول قبل جيوش الخليج نفسها
مصر من سنة 2015 وهي بتحاول تقنع العرب بتفعيل اتفاقية الدفاع المشترك، وبناء جيش عربي قوي، وتطوير الصناعات العسكرية، واستغلال مواردنا وعقولنا علشان ننهض كأمة
بس اللي رفضوا كانوا دول الخليج
طيب نسأل بوضوح:
مين اللي دفع 5 تريليون دولار لأمريكا علشان تدعم إسرائيل وتنفذ مخططاتها في بلادنا، وفي نفس الوقت مش عايز يدعم مصر تبقى قوية وتحميهم؟
مين اللي دخل في السودان وساهم في إشعال الحرب الأهلية وهدد الأمن القومي المصري من الجنوب؟ مش الإمارات؟
مين اللي دعم إثيوبيا فلوس وسلاح وعمل معاها استثمارات بالمليارات، وبيشجعها تعمل ميناء على البحر الأحمر يهدد قناة السويس؟ مش الإمارات؟
ومين اللي دخل باستثمارات ضخمة في سد النهضة اللي بيهدد حصة مصر من الميه؟ مش السعودية؟
مين اللي دعم الإرهاب في سينا وخلى مصر تحارب تنظيمات إرهابية سنين، وندفع تمن اقتصادي وبشري كبير ونقدم شهداء؟ مش قطر؟
مين اللي دخل اليمن وولع فيها حروب؟
مين اللي غير النظام في سوريا وخلى جماعات متطرفة تمسك الحكم، واتدمر الجيش السوري بالكامل وبقت سوريا مفتوحة لكل حد؟ مش دول الخليج؟
مين اللي ساب حماس واتخلّى عنها وسهّل استهداف قياداتها؟
دلوقتي أمريكا عايزة توريطكم في حرب جديدة، تستنزفكم وتدخلكم في صراع مع إيران، وتحولها لحرب عقائدية تاكل الأخضر واليابس
وبعد كده تدخل إسرائيل بسهولة وتسيطر على المنطقة: سوريا ولبنان والخليج، وبعدها ييجي الدور على مصر
فهل المطلوب مننا نساعد في تنفيذ السيناريو ده؟
إحنا عندنا قوة عسكرية كبيرة وقوة بشرية وسلاح، وعارفين كويس إننا نقدر نحمي الخليج كله
بس السؤال: نحميه من مين؟ ونحارب مين؟
هل نحارب دولة إسلامية ما عملتش ضدكم حاجة مباشرة، وهي أصلًا في صراع مع أمريكا وإسرائيل؟
آه، إحنا نقدر نواجه إيران، بس هل مش الأفضل نوفر القوة دي لمعركتنا الحقيقية مع إسرائيل؟
كلمة أخيرة:
إيران وإسرائيل بيستنزفوا بعض
أوروبا ضعيفة وفي خلافات مع أمريكا
الناتو بيضعف
أمريكا نفسها اقتصادها تعبان ومش قادرة تقف قدام الصين وروسيا والبريكس وطريق الحرير
إحنا قدام لحظة مهمة جدًا
يا إما نبقى قوة عربية حقيقية، يا إما نضيع
الحل واضح: اتحاد عربي، فتح أسواق، مصانع، استغلال مواردنا، رجوع عقولنا من بره، بناء جيش قوي، وتصنيع سلاحنا بإيدينا
شوف إيران تحت عقوبات 30 سنة وصلت لإيه في الصواريخ
طب العرب لو اتوحدوا هيعملوا إيه؟
والله هنقود العالم
افيقوا بقى يا حكام وأمراء وشيوخ الخليج والمغرب العربي، واسمعوا صوت العقل المصري بقيادة الرئيس عبد الفتاح السيسي
حفظ الله مصر وجيشها وشعبها وقيادته
محرر صحفى.(رشا على احمد)
تمام يسلم لسانك
ردحذف